KE jep detyrat – Kritika dhe rekomandime Italisë, Francës, Gjermanisë

Ashtu siç pritej, Komisioni Europian kritikoi publikisht Italinë për normën e lartë të borxhit publik dhe mungesën e përpjekjeve për ta ulur normën e borxhit, siç parashtrohet edhe nën rregullat e përbashkëta të unionit monetar.

Roma zyrtare ka kohë deri në muajin Prill që të ndërmarrë masa për uljen e defiçitit strukturor, në të kundërt do të përballet me masa disiplinore. Ndër të tjera, institucioni, deklaroi se, ekonomia franceze po përmirësohet, por se nga ana tjetër, gjendet përballë pasigurive dhe rreziqeve të shtuara.

Kritikat nuk mungojnë as për Berlinin, sa i përket suficitit të tepërt.  Vendet e tjera problematike janë evidentuar si: Bullgaria, Kroacia, Qipro, Finlanda, Irlanda,  Holanda, Portugalia, Sllovenia, Spanja dhe Suedia, pra pjesa dërrmuese e bllokut prej 19 vendesh.

Ndërkohë, të dhënat e fundit të Eurostat konfirmojnë situatën e mirë që po përjeton Eurozona. Norma e inflacionit në Eurozonë konfirmohet në 1.8% gjatë Janarit, nënvizon zyra e statistikave e Bashkimit Europian.

Në terma mujorë, çmimet e konsumit në të 19 vendet e rajonit të monedhës së përbashkët ranë me 0.8%, në linjë me pritshmëritë e tregjeve.

Edhe norma bazë e inflacionit, e zhveshur nga kontributi i produkteve me luhatshmëri të lartë, konfirmohet në 0.9%, sa projektonte vetë Eurostat në fund të muajit Janar.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.