KE, marrëveshje për vaksina shtesë: BioNTech-Pfizer, 215 milionë doza vetëm në tremujorin e parë të 2022
Komisioni Europian njoftoi se ka arritur një marrëveshje me BioNTech dhe Pfizer për një shtesë prej 20 milionë doza të vaksinave kundër Covid-19, të cilët do të dërgohen në vendet anëtare të unionit në tremujorin e parë të vitit 2022. Këto doza i shtohen 195 milionë dozave të tjera që janë të planifikuara të mbërrijnë në Bashkimin Europian gjatë tre muajve në vijim, duke e çuar totalin për tremujorin e parë në 215 milionë doza, thuhet në një deklaratë të komisionit.
Gjithashtu, Komisioni Europian dhe vendet anëtare kanë ushtruar një opsion për të porositur edhe 200 milionë doza të vaksinës së BioNTech-Pfizer të përshtatura për variantin Omicron, të cilat pritet të dërgohen në tremujorin e dytë të vitit të ardhshëm. Në këtë mënyrë, numri total i dërgesave nga BioNTech-Pfizer dp të arrijë në 650 milionë doza, gjatë vitit 2022. Qeveritë në të gjithë Europën po përpiqen të ulin kurbën në rritje të infektimeve me Covid-19, të shkaktuara nga përhapja e shpejtë e variantit të sapozbuluar të koronavirusit, omicron.
Gjithashtu, në datën 16 dhjetor Komisioni Europian njoftoi se kishte arritur një marrëveshje me kompaninë Moderna për të rritur dërgesat e kompanisë amerikane drejt Gjermanisë dhe vendeve të tjera anëtare. Në mbyllje të njoftimit, komisioni thotë se “në funksion të përkeqësimit të situatës epidemiologjike në Bashkimin Europian gjatë muajve të fundit, vaksinimi i plotë dhe dozat mbështetëse mbeten një nga prioritetet kryesore shëndetësore të BE-së”. Paralelisht, Komisioni Europian do të vijojë të bashkëpunojë ngushtë me prodhuesit e tjerë të vaksinave për të shpejtuar procesin e dërgimit të dozave.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.