KE më optimiste për Shqipërinë – Rishikon në rritje ekonominë për këtë vit dhe për vitin e ardhshëm
Komisioni Europian ka rishikuar në rritje projeksionet për ekonominë shqiptare gjatë këtij viti dhe atij të ardhshëm. Projeksionet e fundit, së bashku me vlerësimin për ecurinë e ekonomisë shqiptare janë publikuar në raportin e tremujorit të katërt për vendet kandidate.
Kështu, Komisioni Europian flet për një normë rritje të ekonomisë shqiptare prej 3.8% këtë vit, nën projeksionet e qeverisë shqiptare dhe lehtë mbi ato të Bankës Botërore që flasin për një rritje pranë 3.6%.
Ndër të tjera, Komisioni Europian ka rishikuar kështu projeksionet e mëparshme që flisnin për 3.7% rritje. Sa i përket vitit të ardhshëm ndërkohë, projeksionet janë ngjitur në 4.2% rritje, nga 3.9% që vlerësohej më parë.
Këto projeksione janë plot 0.7 pikë përqindje mbi ato të Bankës Botërore, dhe më optimistet ndër institucionet ndërkombëtare, çka sinjalizon se, Brukseli është bindshëm më optimist për ekonominë shqiptare se më parë.
Sipas këtyre projeksioneve, rezulton se, ekonomia shqiptare, si këtë vit, ashtu edhe vitin e ardhshëm do të jetë ekonomia me rritjen më të shpejtë në rajon.
Edhe gjatë vitit të kaluar, Komisioni Europian rishikoi disa herë në rritje ekonominë shqiptare, si pasojë e performancës mbi pritshmëritë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.