KE për rikthimin e vizave – “S`kemi kërkesë, por do ta vlerësojmë kur të vijë. Shqipëria i ka zbatuar kriteret”

Komisioni Europian ka reaguar zyrtarisht për vendimin më të fundit të Parlamentit Holandez, që ka kërkuar rikthimin e regjimit të vizave me Shqipërinë. Në daljen për mediat, zëdhënësja e Komisionit Europian, Natasha Bertaud, u shpreh se nuk ka ende asnjë kërkesë për Brukselin, por se do ta shqyrtojë atë në rast se do të vijë.

“Komisioni Europian është në dijeni të mocionit që kaloi dje në Parlamentin holandez, por ende nuk ka asnjë kërkesë zyrtare konkrete që kërkon heqjen e regjimit të liberalizimit të vizave. Sot ne nuk kemi marrë asnjë kërkesë për akvitizimin e heqjes së regjimit të vizave, nga asnjë prej vendeve anëtare. Padiskutim që në rast se një kërkesë e tillë do të vijë, ne do ta analizojmë dhe vlerësojmë me kujdes për të vendosur në rast se duhen marrë veprime konkrete në linjë me mekanizmin dhe bazuar në të gjitha të dhënat si dhe duke marrë në konsideratë edhe rrethanat.”

Por, Komisioni Europian nënvizon se i qëndron raportit të publikuar në muajin Dhjetor për vendet e Ballkanit Perëndimor dhe partneritetit të lindjes sa i përket kritereve të liberalizimit të vizave. Për Komisionin Europian, Shqipëria i ka plotësuar kriteret e kërkuara.

“Do të doja të evidentoja raportin e fundit të Komisionit për përmbushjen e kritereve nga vendet e Ballkanit, ku arrinim në përfundimin se, të gjitha vendet, përfshirë Shqipërinë, vazhdojnë t`i përmbushin kriteret për liberalizimin e vizave, por se duhet ende të ndërmarrin hapa para në disa drejtime.”

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.