Këmbimi valutor/ Dollari në kolaps, bie në nivelin më të ulët të tre vjetëve – Rënie edhe për valutat e tjera kryesore
Frikërat për një ngrirje të buxhetit të qeverisë amerikane dhe dobësitë që vijnë nga trendi botëror i normalizimit të politikave monetare, kanë bërë që Dollari të bjerë në nivelin më të ulët të tre viteve të fundit kundrejt shportës së valutave kryesore.
Ky kolaps në tregjet botërore është pasqyruar edhe në tregun vendas të këmbimit valutor, ku valuta e Shteteve të Bashkuara ka humbur 0.6 pikë kundrejt lekut nga dita e mëparshme.
Tashmë një dollar këmbehet me 108.7 lekë, një raport që nuk shihej prej dhjetorit të vitit 2014.
Nga momenti negativ i valutës amerikane përfiton euro, e cila tashmë këmbehet për 1.227 dollarë. Por në tregun vendas është një tjetër histori, pasi valuta e Eurozonës ka regjistruar një rënie me 0.1 pikë ndaj lekut. Gjithsesi ky nivel konsiderohet ende i lartë për euron, krahasuar me muajt e fundit.
Rënie të lehtë ka regjistruar ditën e premte edhe paundi britanik, i cili është zhvlerësuar me 0.2 pikë ndaj lekut. Për stërlinën kjo konsiderohet vetëm një ndalesë e momentit, pasi investitorët kanë ende pritshmëri të mëdha.
Sa i takon valutave të tjera, franga zvicerane ka patur edhe luhatjen më të madhe të ditës, duke fituar plot 0.5 pikë kundrejt lekut. Tashmë një frangë këmbehet për 113.8 lekë dhe tregon se valuta po i rikthehet niveleve normale.
Dollari australian e nis fundjavën me një rritje të lehtë me 0.1 pikë ndaj lekut, ndërsa e kundërta ndodh me dollarin kanadez, i cili është dobësuar me 0.1 pikë.
Valuta | Shitet | Blihet |
EUR/ALL | 133.60 | 134.20 |
USD/ALL | 109.30 | 110.00 |
GBP/ALL | 151.50 | 152.50 |
AUD/ALL | 87.00 | 88.00 |
CAD/ALL | 87.50 | 88.50 |
CHF/ALL | 113.30 | 114.20 |
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.