Këmbimi valutor, dollari vazhdon “gremisjen” – Paundi britanik humbet fitimet e javës ndaj lekut

Tregu vendas i këmbimit valutor ditën e premte ka shfaqur një zhvlerësim të monedhave kryesore ndaj lekut.

Dollari amerikan vazhdon të njohë nivele edhe më të ulëta këtë vit dhe duket se edhe gjatë Shkurtit nuk do ia dalë të ringrihet. Sot valuta e Shteteve të Bashkuara ka regjistruar një rënie të fortë me 0.8 pikë kundrejt lekut dhe mbahet në kursin e 106.3 lekëve. Kujtojmë që në fillim të javës, një dollar këmbehej për 107.4 lekë, çka përkthehet në një rënie prej 1.1 lekësh.

Në rënie të ndjeshme është paraqitur situata edhe për stërlinën, e cila ka rënë me plot 1.2 lekë nga nivelet e ditës së djeshme. Kjo valutë kishte qenë në rritje konstante gjatë kësaj jave, duke kapur majën në 152.5 lekë, pasi e kishte nisur javën në kursin e 151.7 lekëve. Në këtë mënyrë paundi britanik ka humbur të gjitha fitimet e javës ndaj monedhës vendase.

Ky zhvlerësim i papritur lidhet me refuzimin nga ana e Bashkimit Europian të planit pas Brexit që Londra të qëndrojë si qendra financiare e unionit.

Nëse kjo politikë ka rezultuar katastrofale për valutën britanike, edhe për euron nuk ka qenë e suksesshme. Valuta ra në tregjet ndërkombëtare me 0.1%, një rënie e cila nuk është pasqyruar në tregun vendas. Euro vazhdon të këmbehet në të njëjtin kurs që ka ndjekur gjatë javës, e fiksuar në nivelin e 133.2 lekëve.

Rënie këtë të premte ka regjistruar edhe franga zvicerane, duke humbur 0.4 pikë ndaj lekut. Po ashtu ka ndjekur trendin rënës dollari australian duke humbur plot 0.8 pikë ndaj lekut.

E vetmja valutë që këtë fundjavë regjistron rritje është dollari kanadez, valutë e cila është forcuar me 0.7 pikë ndaj lekut, duke kapur nivelin e 86.5 lekëve.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.