Këmbimi valutor, Euro kthehet në normalitet – Dollari dhe paundi në nivelin më të ulët të javës
Ditën e enjte, tregu i këmbimit valutor ka sjellë rikuperimin e humbjeve që Euro kishte patur ndaj lekut ditën e mëparshme. Tashmë monedha e Eurozonës këmbëhet sërish në nivelin e 133.3 lekëve, nivel që e ka shoqëruar gjithashtu gjatë muajve Shtator dhe Tetor.
Rekuperimi reflekton edhe përmirësimin e performancës së kësaj valute ndaj shportës së valutave të tjera kryesore ndërkombëtare. Pas një dobësimi në fillim të muajit Nëntor, Euro ka shtuar ritmin ndaj Dollarit Amerikan dhe sot këmbehet me 1.183 USD.
Ndërkohë, valuta amerikane është dobësuar edhe kundrejt monedhës vendase. Dollari ra me plot 0.3 pikë ndaj lekut krahasuar me ditën e djeshme dhe tashmë shitet për 113.2 lekë. Rënia e dollarit mund të justifikohet edhe me shqetësimet e investitorëve se Rezervat Federale do të përqendrohen në mbajtjen e inflacionit në nivel të ulët, në vend që të rrisin ekonominë.
Me 0.3 pikë ra edhe paundi britanik kundrejt lekut, por rënia është edhe më e madhe krahasuar me fillimin e javës, kur kjo valutë shitej për 150.5 lekë. Tashmë, në nivelin e 149.7 lekëve, GBP i kthehet niveleve normale të muajve të fundit.
Sa i takon valutave të tjera kryesore, dollari australian dhe ai kanadez vazhdojnë të mos kenë luhatje përgjatë gjithë javës. Ndërkohë, franga zvicerane shënoi një rritje me 0.5 pikë, e tashmë shitet për 140.5 lekë, duke kapur nivelin e ditës së hënë.
Valuta | Shitet | Blihet |
EUR/ALL | 133.30 | 133.90 |
USD/ALL | 112.50 | 113.20 |
GBP/ALL | 149.70 | 150.50 |
AUD/ALL | 85.50 | 86.30 |
CAD/ALL | 88.50 | 89.50 |
CHF/ALL | 114.50 | 115.50 |
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.