Këmbimi valutor, investitorët braktisin Dollarin amerikan – Euro dhe paundi në pritje të raundit të radhës të negociatave
Ditën e sotme në tregun e këmbimit valutor në vend, Dollari amerikan ka shënuar një rënie të ndjeshme kundrejt lekut. USD shitet sot për 112.3 lekë, duke u dobësuar me 0.9 pikë kundrejt ditës së djeshme.
Arsyeja e kësaj luhatjeje është vendimi i Rezervave Federale për të mos ndryshuar projeksionet e normave të interesit për vitin e ardhshëm. Kjo ka bërë që investitorët që prisnin një rritje të normave, të heqin menjëherë dorë nga valuta.
Dollari zbret kështu në nivelin e fundit të Nëntorit, ndërsa ka shënuar dobësim edhe kundrejt valutave të tjera. Euro është forcuar kundrejt valutës amerikane dhe tashmë këmbehet për 1.184 dollarë.
Në raport me lekun, valuta e përbashkët europiane mbetet në nivele ende të ulëta dhe këmbehet për 133 lekë. Një rënie kaq drastike u prek shkurtimisht gjatë muajit Nëntor, ndërsa shoqëroi edhe muajt e verës.
I pandryshuar ka mbetur edhe paundi britanik, i fiksuar në vlerën e 151 lekëve. Për stërlinën, kursi i këmbimit valutor ka ndjekur prej muajsh ecurinë e bisedimeve me Bashkimin Europian për Brexit, duke reflektuar çdo fitim dhe humbje në negociata.
Franga zvicerane ndërkohë ka shënuar një rënie të lehtë me 0.2 pikë kundrejt lekut. Në humbje e ka nisur ditën edhe dollari kanadez, me 0.6 pikë, ndërsa dollari australian ka vazhduar të forcohet kundrejt monedhës vendase, kësaj radhe duke fituar 0.5 pikë më tepër në kursin e këmbimit.
Valuta | Shitet | Blihet |
EUR/ALL | 133.00 | 133.70 |
USD/ALL | 112.30 | 113.00 |
GBP/ALL | 151.00 | 152.00 |
AUD/ALL | 86.00 | 86.80 |
CAD/ALL | 87.40 | 88.50 |
CHF/ALL | 113.80 | 114.50 |
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.