Këmbimi valutor/ Leku forcon pozitat – ‘Shemben’ valutat e huaja

Valutat kryesore ndërkombëtare janë dobësuar ndjeshëm ndaj monedhës kombëtare, lekut. Rënien më të madhe e kanë regjistruar dollari amerikan dhe paundi britanik gjatë ditës së enjte. Ky  fundit ka rënë më plot 0.8 lekë për njësi, duke zbritur kështu në kuotën e 142 lekëve. Situata e krijuar në Britaninë e Madhe lidhur me marrëveshjen Brexit e ka dobësuar tej mase valutën.

Ndërkohë, i dobët përballë lekut është shfaqur sot edhe dollari amerikan, i cili edhe gjatë ditës së sotme ka humbur 0.5 lekë për njësi kundrejt monedhës vendase. Ai këmbehet sot në pikat e këmbimit valutor për 109.5 lekë në blerje dhe 110 lekë në shitje.

Euro po ashtu ka ndjekur të njëjtin trend rënës, ku është zhvlerësuar minimalisht me 0.1 lekë për, duke zbritur kështu në kuotën e 124.2 lekëve.

Ndërsa, krejt ndryshe paraqitet situata për dollarin australian i cili është fuqizuar me plot 0.5 lekë për njësi dhe është një nga monedhat që është rritur me 2.5% gjatë 15 ditëve të fundit.

Ndërkohë, dollari kanadez ka regjistruar një rënie të lehtë duke zbritur kështu në kuotën e 82.8 lekëve, ndërsa franga zvicerane nuk ka regjistruar luhatje dhe vijon të këmbehet për 109 lekë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.