Kërkesa e dobët rrëzon naftën – Tensioni në Lindjen e Mesme kufizon humbjet
Çmimet e naftës po qëndrojnë në rënie të lehtë edhe në sesionin e sotëm, për shkak të shqetësimeve që kanë të bëjnë me ngadalësimin e kërkesës, të cilat kanë eklipsuar rreziqet që lidhen me tensionin SHBA-Iran.
Nafta Brent e Londrës po tregtohet në rreth 64.7 dollarë për fuçi, ndërsa nafta Bruto amerikane po tregtohet në rreth 57.9 dollarë për fuçi. Shpresat për progres në bisedimet tregtare mes Kinës dhe Shteteve të Bashkuara, gjatë samitit të G20-ës, janë dëmtuar nga një zyrtar amerikan, i cili tha se, presidenti Donald Trump, do të ishte i kënaqur edhe nëse nuk do të kishte progres gjatë negociatave.
Ndërkohë, të dhënat e dobëta mbi sektorin e manifakturës të publikuara nga Rezerva Federale e Dallasit kanë shtuar shqetësimet për rënien e kërkesës për naftë, kryesisht për shkak të konfliktit tregtar. Për sa i përket tensioneve në Lindjen e Mesme, presidenti amerikan, Donald Trump, vendosi sanksione ndaj Liderit Suprem të Iranit, Ayatollah Ali Khamenei dhe ndaj zyrtarëve të tjerë iranianë. Por, Teherani zyrtar tha se, kjo lëvizje i mbyll dyert përpjekjeve të diplomacisë.
Trump, tha gjithashtu nëpërmjet Twitter-it se, edhe vendet e tjera duhet të mbrojnë anijet e tyre me naftë në Lindjen e Mesme dhe këtë nuk duhet të bëjnë vetëm Shtetet e Bashkuara. Ndërkohë, Organizata e Vendeve Eksportuese të Naftës dhe aleatët duke përfshirë Rusinë, me shumë mundësi do të shtyjnë marrëveshjen për uljen e prodhimit, gjatë takimit që zhvillohet në 1 dhe 2 korrik.
Ministri rus i Energjisë, Alexander Novak, deklaroi se bashkëpunimi ndërkombëtar ka ndihmuar në stabilizimin e tregjeve të naftës.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.