Kërkesa për naftë, në rimëkëmbje / Barclays: Do ketë presione nga infeksionet në Azi dhe rikthimi i Iranit në treg

Banka britanike Barclays, deklaroi se pritet një rimëkëmbje graduale e kërkesës për naftë ndërkohë që rihapen ekonomitë, duke shtuar se është optimiste për çmimet, pavarësisht rritjes së rasteve të koroanvirusit në Azi dhe rikthimit të furnizimeve nga Irani.  Banka shkurtoi vlerësimet e kërkesës për tregjet në zhvillim në Azi, përjashtuar kinën, duke theksuar rrezikun e rikthimit të infeksioneve.  “Kufizimet në lëvizje tek rajoni do ngadalësojnë rimëkëmbjen e kërkesës. Megjithatë, nuk pritet të ngecë për një periudhë të gjatë, prej rezultateve pozitive të vaksinimit në të gjithë botën”-deklaroi Barclays.  Banka pret që nafta Brent e Londrës të rritet në një mesatare prej 66 dollarë për fuçi, ndërsa nafta Bruto amerikane në 62 dollarë, këtë vit.   Sipas raportit, marrëveshja për të ringjallur marrëveshjen bërthamore të Iranit, mund të sjellë rreziqe tek perspektiva e çmimeve në gjysmën e dytë të vitit. Nëse Shtetet e Bashkuara heqin sanksionet ndaj Iranit, vendi i Lindjes së Mesme mund të shtojë dërgesat e naftës, duke rritur ofertën botërore.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.