Kërkesa: TVSH për produktet e detit, blegtorisë e bujqësisë të bëhet 4%. Në një drekë familjare prej 4 anëtarësh, i pesti që ushqehet është shteti
Operatorët turistikë kërkojnë uljen e TVSH-së për produktet bujqësore e blegtorale si dhe për ato të detit. Ky vendim do të sillte menjëherë uljen e faturës për turistët duke e bërë vendin edhe në konkurrues. Ata pohuan për “Gazeta Shqiptare” se me paketat turistike që ofrojnë, jo në pak raste humbasin konkurrencën e drejtëpërdrejtë me vendet e rajonit.
Eduart Xhepa, kreu i Shoqatës së Hoteleri-Turizmit në Durrës i bëri apel qeverisë që të ulë TVSH-në e prodhimeve bujqësore e blegtorale vendase në raport më vendet e rajonit.
Në këtë rast propozohet që të ndiqet shembulli i Italisë. “Tatimi mbi Vlerën e Shtuar në masën 20 % ose TVSH-ja për prodhimet vendase frenon në masë prodhimin vendas dhe çmimet janë më të larta për të gjithë konsumatorët” tha Xhepa. Ndërsa sqaroi se “për aq kohë sa tatimi mbi vlerën e shtuar është 20% në një drekë familjare prej 4 anëtarësh, i pesti që ushqehet është shteti. E thënë ndryshe, nëse fatura e një dreke kushton 10 mijë lekë të reja për 4 persona, 2 mijë lekë automatikisht shkojnë si tatim mbi vlerën e shtuar për shtetin”.
Propozimi i Shoqatës së Turizmit në Durrës është që “nëse operatorët turistikë vendas duan të konkurrojnë me vendet e rajonit, qeveria shqiptare duhet ta ulë nga 20% në 4% Tatimin mbi Vlerën e Shtuar për prodhimet vendase bujqësore e blegtorale dhe ato të peshkut.
Pak kohë më parë qeveria miratoi vendimin për të ulur në 6 % TVSH për hotelet dhe strukturat e tjera akomoduese.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.