Kërkesat e BE-së për hekurudhën – Parashikohet ngritja e Autoritetit të Sigurisë Hekurudhore, parakusht për negociatat
Detyrimet që duhet të përmbushë vendi ynë në kuadër të anëtarësimit në Bashkimin Evropian kanë detyruar qeverinë shqiptarë të dorëzojë në Kuvend një projektligj që parashikon krijimin e Autoritetit të Sigurisë Hekurudhore, si një entitet tërësisht i pavarur. Sipas relacionit që shoqëron projektligjin në Kuvend, themelimi i një Autoriteti të pavarur është një parakusht ligjor për hyrjen në BE dhe për zbatimin e legjislacionit europian.
Gjithashtu, sipas relacionit krijimi i Autoritetit të Sigurisë Hekurudhore është një nevojë parësore e tregut hekurudhor të vendit tonë, atij rajonal dhe evropian, pasi aktualisht, çështjet e sigurisë hekurudhore dhe investigimit të aksidenteve dhe incidenteve janë të integruara brenda Drejtorisë së Inspektimit Hekurudhor (DIH), gjë që nuk është në përputhje me Kodin Hekurudhor, të miratuar në vitin 2016.
Ky ligj shërben për ngritjen e një organi që me detyrat që do të realizojë suprimon krejtësisht organin aktual të Inspektoratit Hekurudhor, ndërkohë që nuk do të ketëb ndryshime në drejtim të numrit të stafit. Sistemi hekurudhor në vendin tonë është pak i zhvilluar, teksa ky tarsbnport përdoret kryesisht për transportimin e mallrave. Aktualisht, i vetmi projekt që pritet t’i japë një hov të ri sektorit është hekuruadhe e re Tiranë-Durrës dhe degëzimi i ri për në aeroportin e Rinasit, pasi tashmë është përzgjedhur edhe kompania fituese që do të kryejë punimet.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.