Kërkesat për azil, 1/10 pranohet – Eurostat: Shqiptarët janë të 19-tët në listën e vendeve të origjinës
Në të gjithë Bashkimin Europian janë rreth 20 mijë shqiptarët që kanë aplikuar për azil përgjatë 2018-ës, duke qenë pjesë e listës se 10 vendeve kryesore të origjinës.
Ndërkohë, të dhënat më të fundit të Eurostat tregojnë se, norma e pranimit të kërkesave për azil për shqiptarët është në vetëm 8%. Kjo na rendit në vendin e 19-të në listën e vendeve të origjinës së azilkërkuesve për nga norma e pranimit të kërkesës. Kështu, më pak se 1/10 shqiptarë që aplikojnë për azil në vendet e Bashkimit Europian kanë gjasa që t`iu pranohet kërkesa.
Normat mjaft të ulëta të pranimit vijën si pasojë e klasifikimit të Shqipërisë si një vend i sigurt origjine. Pavarësisht normës mjaft të ulët, Shqipëria është i vetmi vend rajonal pjesë e listës, si dhe ndër të paktat vendet europiane, së bashku me Turqinë, Rusinë, Ukrainën dhe Gjeorgjinë, të gjitha këto vende në problem serioze me nivelin e demokracisë dhe respektimin e të drejtave të njeriut.
Sipas Eurostat, vendet e Bashkimit Europian i dhanë azil 300 mijë njerëzve gjatë 2018-ës. Shteti më bujar rezulton të jetë Gjermania me 139600 kërkesa të pranuara, e ndjekur nga Italia me rreth 47 mijë dhe Franca me rreth 41 mijë. Ndërkohë, sirianët kryesojnë listën e pranimeve, me 88% të kërkesave për azil të aprovuara.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.