Kërkesat për punësim nga biznesi – Kule: Të diplomuarit në “Ekonomi” i përgjigjen tregut të punës
Diplomohen rreth 1963 studentë të Fakultetit të Ekonomisë në Universitetin e Tiranës. Sipas të dhënave nga vetë ky fakultet rezulton se çdo vit rreth 10% e të diplomuarve punësohen në sektorin publik, ndërsa pjesa tjetër në atë privat. Sipas dekanit Dhori Kule, studentët që diplomohen në këtë fakultet janë të aftë për t’ju përgjigjur tregut të punës.
“Vitin e kaluar përfunduan studimet master rreth 710 studentë. Të pranishëm sot nga studentët e masterit me gjithë informacionin, kërkesat, njoftimet që u bënë, kanë ardhur vetëm 10 për qind. Pse? Janë të gjithë në punë. Pra, mbi 90 për qind e studentëve tanë që mbarojnë studimet master, punësohen. Një pjesë e madhe e studentëve që janë në vitin e parë e studimeve master janë përsëri të punësuar. Pra, tregon që cilësinë e mirë, studentët e mirë, specialistët e mirë, tregu i punës i kërkon dhe i absorbon.”
E pranishme në këtë aktivitet ishte edhe ministrja e Arsimit, Lindita Nikolla e cila u shpreh se do të punojnë për përshtatjen e diplomave sipas nevojave të tregut të punës.
“Unë do të doja që në këtë ceremoni dhe në një ditë të bukur në fakt për të gjithë studentët e diplomuar do të thoja që: Po, jam e gatshme për të zhvilluar të gjitha përgjegjësitë për gjithçka që ne duhet të bëjmë për të mësuar një histori suksesi për të gjitha të rejat e të rinjtë e Shqipërisë. Diploma të përshtatura me tregun e punës, por edhe universitete tashmë të akredituara ndërkombëtarisht, dinjitoze në hapësirën europiane të arsimit të lartë.”
Të pranishëm në këtë aktivitet ishin edhe guvernatori i Bankës së Shqipërisë Gent Sejko si dhe kryetari i Dhomës së Tregtisë dhe të Industrisë së Tiranës Nikolin Jaka. Sipas tyre të dyja këto institucione janë të hapura për bashkëpunim me Fakultetin e Ekonomisë duke ju hapur një dritare të rinjve që diplomohen pranë tij.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.