Kërkohet përsëri shkarkimi i Trump. Demokratët kërkojnë heqjen e presidentit prej veprimeve të rrezikshme
Demokratët në Kongres kanë kërkuar shkarkimin e presidentit Donald Trump për të dytën herë, pak ditë pasi akuzat e pabaza të tij mbi mashtrimin zgjedhor, inkurajuan një grup të protestuesve që të hyjnë në selinë e Kongresit me dhunë. Liderët demokratë, përfshirë kryetaren e Dhomës së Përfaqësuesve, Nency Pelosi dhe liderin e pakicës në Senat, Chuck Schumer, bënë thirrje për ndjekje të menjëhershme të shkarkimit, nëse kabineti refuzon të heq Trump nga pushteti.
“Veprimet e rrezikshme të presidentit e bëjnë të nevojshme heqjen e menjëhershme të tij nga detyra”- deklaruan ata, duke akuzuar Trump për nxitjen e një “kryengritjeje”. Ndërkohë që thirrjet për largimin e tij u shtuan, Trump publikoi një video ku fajësonte dhunën që la 5 persona të vdekur. Presidenti republikan ka bërë hapin më të madh drejt pranimit të humbjes më 3 Nëntor, pasi premtoi një tranzicion të butë tek administrate e re. Presidenti i zgjedhur Joe Biden, pritet të betohet më 20 Janar.
Komentet e Trump bënë kontrast me fjalimin e tij ditën e Mërkurë, ku nxiti një turmë të protestuesve që të hyjnë në Kapitol, ndërkohë që Kongresi po takohej për të konfirmuar fitoren e Biden. Protestuesit hynë me dhunë tek selia e Kongresit në Kapitol Hill, duke u përplasur me policinë dhe detyruar autoritetet që të transportojnë ligjvënësit në zona të sigurta. Një polic i Kongresit ndërroi jetë nga goditjet e marra gjatë sulmit. Një grua protestuese u qëllua për vdekje nga autoritetet dhe 3 persona ndërruan jetë si pasojë e emergjencave mjekësore.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.