Këshilli Bashkiak i Tiranës miraton bonus qiraje për 606 familje të tjera të dëmtuara nga tërmeti. Dëmshpërblim për 300 familje
Këshilli Bashkiak i Tiranës ka miratuar listën e radhës për bonusin e qirasë për 606 familje të tjera, shtëpitë e të cilave janë bërë të pabanueshme nga tërmeti i 26 nëntorit. Lista totale e familjeve përfituese të bonusit ka shkuar në 1794 gjithsej, ndërsa masa e bonusit të qirasë është përcaktuar në bazë të njësive të banimit.
Në fjalën e mbajtur, kryebashkiaku i Tiranës Erion Veliaj bëri të ditur se pjesë e listës së familjeve dhe personave që do të trajtohen me bonus qiraje janë edhe banorët e strehuar në 10 godinat e Universitetit Bujqësor të Kamzës.
Po ashtu, Këshilli Bashkiak i Tiranës miratoi edhe listën e dëmshpërblimit me 300 familjet e reja, të cilave u është dëmtuar pjesërisht banesa nga tërmeti i 21 shtatorit. Kryebashkiaku Veliaj tha se pas verifikimit të dosjeve, Drejtoria e Emergjencave Civile i ka përcjellë për vlerësim në Këshillin e Qarkut Tiranë. Në total, në Tiranë lista e atyre që janë dëmshpërblyer ka shkuar në 1307.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.