Këshilli Bashkiak i Tiranës miraton PPP për terminalin e autobusëve – Veliaj: Kemi propozime për hotele nga brande ndërkombëtare
Në mbledhjen e ditës së enjte, Këshilli Bashkiak i Tiranës, pavarësisht bojkotit të këshilltarëve të djathtë, miratoi një sërë vendimesh. Ndër to, mori dritën jeshile edhe vendimi për ndërtimin me PPP të terminalit të transportit publik.
“Tirana mezi e pret terminalin e autobusëve. Marrim 99 lavdërime nga turistët, por vetëm një vërejtje: Që nuk ka një vend ku shkon nga Tirana në Berat apo në Gjirokastër. Ne mund të kemi më të mirën e të gjitha kohërave, një terminal modern në Tiranë. Kam hequr pallatet e Lulit nga projekti i terminalit; projekti ishte i mbushur me pallate, me një çik terminal në tokë të shtetit. Ajo që bëmë është që hoqëm gjithë pallatet dhe do të jetë vetëm terminal”, tha Veliaj duke shtuar se do të ketë edhe një terminal tjetër në lindje të qytetit.
Sa i takon turizmit dhe akomodimit, kryebashkiaku zbuloi se së shpejti do të vijnë në Tiranë veç ‘Hilton’ edhe disa brande të tjera të njohura ndërkombëtare. Në fillim të javës, SCAN raportoi për ardhjen e rrjetin amerikan ‘Hyatt’ në tregun e hotelerisë në Shqipëri.
“Kemi marrë disa propozime për hotele të reja në Tiranë. Po këtu fillon kjo kënga oligarkët. Po pse more, njerëzit me ndihmë ekonomike do t’i ndërtojnë hotelet? Ato i bëjnë njerëzit që kanë kapital dhe nesër krijojnë vende pune, dhe i punësojnë këta që sot janë me ndihmë ekonomike. Ky është i vetmi vend në botë ku duhet të korruptosh opozitën që të të lerë të punosh. E patë që te ajo lista mungonin ca veta? Se ata i kishin derdhur lekët. Besoj se ardhja e turistëve në Tiranë, e tregon zhvillimin e qytetit”, tha kreu i bashkisë.
Këshilli Bashkiak kaloi edhe propozimin për ngritjen e dy qendrave sociale, ndër to “Strehëza Tiranë” pranë ambienteve të ish-Uzinës së Autotraktorëve në Shkozë, e ideuar për t’i ardhur në ndihmë personave të pastrehë të ndodhur në situatë rruge. Ndërkohë, Qendra Komunitare “Gonxhe Bojaxhi” do t’i vijë në ndihmë komunitetit të Njësive Administrative 4 dhe 8.
Vendimet e tjera përfshijnë transferimin e zyrave të UKT nga njësia 8 tek inkubatori i biznesit, duke i liruar vendin një shkolle pranë Medresesë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.