Këshilli Europian miraton rregulla të reja për shqyrtimin e investimeve të huaja direkte

Bashkimi Europian së shpejti do të ketë një sërë rregullash të reja për të shqyrtuar më mirë investimet direkte që vijnë nga vendet e treta në bazë të sigurisë ose rendit publik.

Këshilli miratoi këtë të martë një rregullore që krijon një kornizë për shqyrtimin e investimeve të huaja direkte në BE. Kjo është hera e parë që BE është pajisur me një kornizë kaq të gjerë, ndërkohë që partnerët kryesorë tregtarë tashmë kanë rregullat respektive.

“BE është dhe do të mbetet një nga vendet më të hapura në botë për të investuar. Rregullat e reja për shqyrtimin e investimeve do të sigurojnë që hapja të shkojë krah për krah me mbrojtjen e ndjeshme të aseteve tona strategjike”, deklaroi Ştefan-Radu Oprea, Ministër i Mjedisit, Biznesit, Tregtisë dhe Sipërmarrjes së Rumanisë dhe Kryetarit të Këshillit.

Rregullat e reja për shqyrtimin e investimeve të huaja direkte do të krijojnë një mekanizëm bashkëpunimi ku shtetet anëtare dhe Komisioni do të jenë në gjendje të shkëmbejnë informata dhe të ngrenë shqetësime specifike.

Shtetet anëtare megjithatë do të ruajnë fuqinë për të rishikuar dhe potencialisht të bllokojnë investimet e huaja direkte në baza të sigurisë dhe rendit publik. Vendimi për krijimin dhe mirëmbajtjen e mekanizmave kombëtare të shqyrtimit do të mbetet gjithashtu në duart e shteteve anëtare individuale.

Komisioni do të lejohet të japë mendime në rastet që kanë të bëjnë me disa shtete anëtare ose kur një investim mund të ndikojë në një projekt ose program të interesit për të gjithë BE-në, siç janë Horizon 2020 ose Galileo.

Rregullorja do të publikohet më 21 mars 2019. Rregullat e reja do të hyjnë në fuqi njëzet ditë më vonë dhe do të zbatohen 18 muaj më vonë.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.