Këshilli i Investimeve, Denaj: Ligji i unifikuar do të sjellë kapital shtesë dhe krijim vendesh të reja pune

Shqipëria do të ketë së shpejti një ligj të unifikuar për investimet. Në fjalën e mbajtur në mbledhjen e radhës të Këshillit të Investimeve, me temë diskutimi “Mbi potencialet për investime dhe sektorët prioritarë”, ministrja e Financave Anila Denaj tha se unifikimi do të sjellë një klimë më të favorshme si për investimet vendase dhe të huaja, duke dhënë një efekt pozitiv në ekonominë e vendit

“Përmirësimi i legjislacionit në fushën e investimeve përmes Ligjit të Unifikuar të Investimeve, do të sjellë një klimë më të favorshme si për investimet vendase dhe të huaja, duke dhënë një efekt pozitiv në ekonominë e vendit dhe kryesisht në rrjedhën e kapitalit shtesë, transferim teknik dhe menaxherial të dijeve si dhe krijim të vendeve të reja të punës duke përfshirë edhe rritje të kualifikimit profesional” u shpreh Ministrja.

Po ashtu, ministrja Denaj vuri theksin edhe në reformat që janë në proces, siç është ajo e Fiskalizimit, e cila ka për qëllim modernizimin e sistemit të raportimit dhe mbledhjes së taksave në Shqipëri me qëllim rritjen e të ardhurave në buxhet.

“Fiskalizimi synon të transformojë mënyrën e të bërit biznes në Shqipëri duke ofruar transparencë përmes raportimit elektronik dhe në kohë reale; të mundësojë lehtësimin e marrëdhënies mes bizneseve përmes e-faturimit dhe bërë të mundur reduktimin e  ekonominë informale, rrisë efiçencën e kontrollit tatimor”, u shpreh Ministrja.

Sipas Ministres Denaj, konsolidimi fiskal dhe politika ekonomike sektoriale, aty ku janë burimet natyrore, avantazhet konkurruese dhe potenciali i burimeve njerëzore, do të mundësojnë një rritje ekonomike të strukturuar në nivel afatmesëm.

“Rritja ekonomike e synuar në nivelin e 4% në tre vitet në vijim; ulja në vijim e nivelit të papunësisë përtej nivelit më të ulët historik të realizuar në 11.5 % në tremujorin e fundit, kërkon jo vetëm konsolidim fiskal, por edhe politika ekonomike sektoriale aty ku burimet natyrore, avantazhet konkurruese dhe potenciali i madh i kapacitiet human kërkojnë gërshetim strategjish, për të mundësuar një rritje ekonomike të strukturuar në nivel afatmesëm”, tha Ministrja.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.