Këshilli i Ministrave miraton dy grante nga qeveria gjermane dhe ajo suedeze – Në Kuvend, projektligj i ri për statusin e dëshmorit

Në përfundim të mbledhjes së ditës së mërkurë të Këshillit të Ministrave janë miratuar një sërë vendimesh dhe marrëveshjesh.

E tillë është marrëveshja e grantit me qeverinë e Gjermanisë, ku shuma prej 1.95 milionë eurosh do të shkojë për studime fizibiliteti në sektorin e ujit.

Qeveria ka miratuar në parim edhe marrëveshjen e kontributit mes Shqipërisë dhe Agjencisë Suedeze për Bashkëpunim Ndërkombëtar (SIDA). Një grant prej 36.2 milionë koronash suedeze, ose rreth 3.4 milionë eurosh do të përdoret për zbatimin e taksës së pasurisë mbi bazën e vlerës së tregut.

Po ashtu është miratuar edhe marrëveshja e financimit me Komisionin Europian, për fondet IPARD II 2014-2020, të cilat shkojnë si asistencë për zhvillimin bujqësor dhe rural.

Në vendimet e tjera të dala nga mbledhja e sotme, qeveria ka miratuar rregullat për përcaktimin e ofruesit të shërbimit universal postar, ka propozuar një projektligj të ri në Kuvend për statusin e dëshmorit të atdheut, si dhe ka miratuar shpronësimin publik të një blloku banimi në Lushnje, për një vlerë totale prej 1.4 milionë lekësh.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.