KIB paralajmëron: Britania e Madhe dhe BE nuk janë gati për Brexit ‘pa marrëveshje’
“Bashkimi Europian është më pak i përgatitur për një Brexit ‘pa marrëveshje’ sesa vetë Britania, duke lënë potencialisht firmat britanike në një disavantazh nëse nuk ka ndonjë marrëveshje tranzicioni dhe duke dobësuar ndikimin e Londrës në bisedimet e ardhshme tregtare,” bëri me dije një grup punëdhënësish britanikë. BE, me përjashtim të Irlandës, mbetet prapa Britanisë në përgatitjet e saja për rastin e “pa marrëveshjes”, tha të dielën Konfederata e Industrisë Britanike. “Kombinimi i qasjeve të ndryshme të BE-së dhe Mbretërisë së Bashkuar krijon një çekuilibër, ku eksportet e mallrave dhe shërbimeve të BE-së do të kenë qasje më të lehtë në Britani të Madhe sesa eksportet e mallrave dhe shërbimeve britanike në BE”, tha KIB në një raport. “Nga këndvështrimi i biznesit, Mbretëria e Bashkuar ka marrë qasjen më të përgjegjshme, por gjithashtu ka vënë Britaninë e Madhe në një pozitë dobësie relative për negociatat me BE në të ardhmen”.
Edhe pse Britania duhet gjithashtu të përmirësojë gatishmërinë e saj, BE ka marrë deri tani vetëm disa masa të kufizuara dhe të përkohshme, të tilla si lejimi i lejeve të automjeteve të mallrave të rënda britanike për të qenë të vlefshme për nëntë muaj pas një Brexit pa marrëveshje dhe lejimin e aeroplanëve britanikë për të vazhduar fluturimin për gjashtë muaj, tha KIB. BE duhet gjithashtu të njohë skemën e besuar të tregtarit të Britanisë, diçka që tashmë e bën me Kanadanë, Shtetet e Bashkuara dhe Japoninë për të minimizuar burokracinë, shtoi KIB. Britania ka thënë se do të lejojë firmat e shërbimeve financiare nga BE të vazhdojnë të veprojnë në vend për një periudhë kohe përpara se të bëjnë kërkesë për një licencë të re, por blloku ende nuk replikuar.
Kryeministri i ri britanik Boris Johnson ka thënë se dëshiron një marrëveshje të re të Brexit me BE, por është i gatshëm të vazhdojë edhe me një Brexit pa marrëveshje nëse është e nevojshme. Brukseli ka thënë se marrëveshja e rënë dakord vitin e kaluar me ish-kryeministren Theresa May është oferta më e mirë dhe e vetme.
Raporti i KIB, bazuar në reagimet e mijëra firmave, konfirmon se kompanitë në 24 nga 27 sektorët në Britani do të ndërpriten nga një Brexit pa marrëveshje, në afat të shkurtër apo të gjatë, me firmat më të vogla më pak të gatshme se ato më të mëdhatë. KIB bëri më shumë se 200 rekomandime për përmirësimin e masave të paparashikuara, duke përfshirë një thirrje për qeverinë britanike për ta kthyer shërbimin civil menjëherë në një bazë të rastit të ‘pa-marrëveshjes’. Ai i kërkoi BE të përshtatet me lehtësimet e përkohshme të Britanisë në fusha që shkojnë nga të dhënat në dogana dhe të bëj që firmat e Mbretërisë së Bashkuar të aplikojnë për licenca thelbësore si një vend i tretë në fillim të shtatorit. (Reuters)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.