Kimioterapi edhe në Korçë, Beqaj: Këtë vit 100 mln lekë për kimiopreparate
Rreth 100 milionë lekë janë parashikuar në buxhetin e shtetit për nëntë nga kimiopreparatet që duhen për të sëmurët që vuajnë nga kjo patologji. Ndërkohë që edhe spitali Rajonal i Korçës do të ofroj tashmë shërbimin e Kimioterapisë për pacientët e prekur nga sëmundjet tumorale.
Ministri i Shëndetësisë, Ilir Beqaj dhe Zëvendëskryeministri, Niko Peleshi ishin në spitalin Rajonal të Korçës ku panë nga afër mjediset e reja të përgatitura posaçërisht për ofrimin e këtij shërbimi.
“Kemi këtë vit në buxhet 100 milionë lekë për rreth 8-9 kimiopreparate që ka paketa që është e domosdoshme për këto dy patologji, dhe do ta ndjekim në vijimësi në mënyrë që të krijojmë besimin, sigurinë, eksperiencën, por ajo që është më e rëndësishme, shërbimi shumë më i lehtësuar për njerëzit. Një herë në tre javë, të shkosh në Tiranë, domosdo që do të duhet një familjar të të shoqërojë, ajo shoqërohet me efekte anësore, psikologjike, fizike, kështu që të paktën, këtë pjesë, besoj se edhe në Korçë kemi bërë hapat e parë për ta lehtësuar”, theksoi Ministri.
Nga ana e tij, Zëvendëskryeministri Peleshi e vuri theksin tek decentralizimi i shërbimeve shëndetësore.
“Kjo është sfida në fakt, si të dekoncentrojmë shërbimet tona drejtë spitaleve rajonale, siç kemi bërë këtu me dializën në Korçë, siç po bëjmë me këtë shërbim të Kimioterapisë”.
Korça jua bashkua listës së spitaleve rajonale që ofrojnë shërbimin e kimioterapisë siç janë spitali i Shkodrës, Elbasanit, Vlorës dhe Durrësit. Kjo do të lehtësojë punën e pacientëve të cilët ishin të detyruar që tre herë në javë të udhëtonin drej Tiranës.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.