Kina bllokon ekipin e OBSH-së për hetimin e origjinës së COVID

Pekini ka ndaluar hyrjen e një ekipi prej 10 anëtarësh nga Organizata Botërore e Shëndetit, që heton origjinën e pandemisë së koronavirusit, duke mos ju miratuar vizat. Tedros Adhanom Ghebreyesus, drejtori i përgjithshëm i OBSH-së, tha se ishte “shumë i zhgënjyer” pasi Kina bllokoi ardhjen e virologëve.

“Dy anëtarë të ekipit kishin filluar udhëtimet e tyre, ndërsa të tjerët nuk ishin në gjendje të udhëtonin, në minutën e fundit” tha Tedros.

Ai shtoi se OBSH ka qenë në kontakt me zyrtarë kinezë, të cilët janë shprehur se do të përshpejtonin procedurën e miratimit të vizave. Progresi i ngadaltë i hetimit të OBSH-së dhe mungesa e aksesit për të hyrë në vendin e origjinës së pandemisë ka tërhequr kritika nga Shtetet e Bashkuara të Amerikës, e cila kërkon transparencë më të madhe nga disa qeveri perëndimore.

Donald Trump ka kërcënuar të pezullojë fondet amerikane për OBSH – në dhe të tërhiqet nga agjencia shëndetësore globale, pasi e akuzoi atë për “keqmenaxhim” të pandemisë. Huang Yanzhong, një bashkëpunëtor i vjetër për shëndetin global në Këshillin për Marrëdhëniet e Jashtme në New York, tha se ky ishte sigurisht një ogur i keq për hetimin e ardhshëm të OBSH-së në Kinë.

Ai shtoi se kritikat e rralla publike të OBSH-së për Kinën mund të ndihmojnë në forcimin e besueshmërisë ndërkombëtare të organizatës dhe në ndikimin e saj mbi Pekinin kur negociojnë për qasje, siç ndodhi gjatë një hetimi të vitit 2003, në origjinë të shpërthimit të Sars. Kina ka pohuar se e mirëpret hetimin, i cili do të përqendrohet kryesisht në identifikimin se kur, ku dhe si virusi Sars-Cov-2, që shkakton Covid-19, bëri kapërcimin nga kafshët tek njerëzit.

“Të gjurmosh burimin e virusit është një çështje e komplikuar. Për të siguruar që puna e ekipit ndërkombëtar të përparojë normalisht, ata duhet të kalojnë nëpër procedurat e nevojshme” tha Hua Chunying, një zëdhënës i Ministrisë së Jashtme kineze, në përgjigje të pyetjeve në lidhje me vonesën.

Shumë shkencëtarë besojnë se sëmundja ka origjinën nga lakuriqët e natës, të cilat është zbuluar se mbartin lloje të virusit gjenetikisht të ngjashme. Por shumë faza të transmetimit të virusit te njerëzit mbeten të paeksploruara.

Një teori kryesore, e cila sugjeroi që infeksionet e para njerëzore erdhën nga një treg në Wuhan ku specie të shumta të botës së egër ishin në shitje, është vënë në pikëpyetje, pasi u zbuluan disa raste të hershme pa një lidhje të dukshme me vendndodhjen.

Pavarësisht nga pasiguria në lidhje me rrugën e saktë të transmetimit, ekspertët e OBSH-së kanë pohuar se hetimi duhet të fillojë në Wuhan. Zyrtarët kinezë, megjithatë, kanë sugjeruar vazhdimisht se origjina e virusit është jashtë vendit.

Media shtetërore e vendit gjithashtu ka marshuar teori dytësore dhe ka raportuar në mënyrë selektive hulumtimet ndërkombëtare, për të argumentuar se virusi filloi diku tjetër dhe arriti vetëm më vonë në Wuhan, ndoshta përmes mallrave të ngrira.

Gjatë fundjavës, Wang Yi, Ministri i Jashtëm kinez, deklaroi se gjithnjë e më shumë kërkime sugjerojnë se pandemia ka të ngjarë të jetë shkaktuar nga shpërthime të ndara në shumë vende në botë.

Burimi origjinal: Financial Times

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.