Kina cakton objektivat – Toleron një rritje në 6.5% për të trajtuar rreziqet në 2017
Zyrtarët në Kinë kanë caktuar një objektiv të rritjes së ekonomisë në rreth 6.5% për këtë vit, ndërkohë që vendi vazhdon të ndjekë një politikë të qëndrueshme monetare. Kryeministri i vendit, Li Keqiang bëri të ditur se do të tolerohet një rritje më e ngadaltë ekonomike për të lënë hapësirë në trajtimin e borxhit të madh në vend.
Huadhënia në nivele rekord dhe shpenzimet e mëdha qeveritare kanë nxitur shqetësimet për nivelet e mëdha të borxhit dhe tregun e pronave. Në vitin 2016, Produkti i Brendshëm Bruto i ekonomisë së dytë më të madhe në botë u rrit me 6.7%, norma më e ngadaltë në 26 vite, megjithatë brenda segmentit objektiv të Qeverisë.
Kryeministri thotë se norma 6.5% këtë vit duhet për të arritur edhe objektivat mbi punësimin. Ndërsa qeveria përpiqet të ndryshojë modelin e rritjes ekonomike nga manifaktura në shërbime, duhet të krijojë në mënyrë të shpejtë vende të reja pune për miliona punonjës, ose rrezikon trazira sociale.
Qeveria do të vazhdojë të fokusohet në sektorët e qymyrit dhe çelikut, duke u përpjekur të reduktojë kapacitetin. Kryeministri thotë se do të ndërmerren gjithashtu hapa për të kontrolluar rreziqet në sektorin financiar.
Ai tha se Kina duhet të ketë nivel më të lartë mbikëqyrjeje për rreziqet nga aktivet me probleme, dështimet e pagesave, bankingun hije (p2p) dhe financimin në internet. Sektori i korporatave do të jetë prioritet këtë vit, ku do të përqendrohet ulja levës financiare (financimit me borxh).
Kina planifikon gjithashtu të përshpejtojë titullizimin e aktiveve dhe këmbimet e borxhit me tituj kapitali.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.