Kina hap korsi për njerëzit e ngjitur pas ekranit – Tani mund të rrinë në celular pa u shqetësuar
Për shumë njerëz, varësia ndaj celularëve mund të jetë një gjë e keqe. Por qyteti Xi’an në Kinë ka vendosur ta përqafojë atë.
Tashmë përgjatë fundjavave, këmbësorët në qytetin verior mund të ecin me celularët e tyre në dorë dhe kokën poshtë, përgjatë një hapësire në trotuar të dedikuar.
E quajtur “Rruga Yanta”, ajo gjendet pranë një qendre tregare dhe ka një gjatësi prej 100 metrash dhe një gjerësi prej 80 centimetrash, duke ofruar një hapësirë mëse të bollshme për kalimtarët që përdorin telefonin.
Ajo është e shënjuar me një imazh telefoni dhe fjalën “celular” përgjatë anëve të korsisë. Ndërkohë, pjesa tjetër e trotuarit pranë saj ka një imazh që tregon se ndalohen celularët.
Ashtu si korsia e parë për telefonë, e prezantuar në qytetin Chongqing në vitin 2014, edhe kjo e fundit kërkon të rrisë sigurinë.
Diçka të tillë e ka eksperimentuar edhe SHBA gjatë vitit 2014, kur në Uashington u prezantua një trotuar i ndarë në dy anë, ku njëri ishte i dedikuar për qytetarët që përdorin celularin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.