Kina hap zyrtarisht mega-aeroportin e saj më të ri – Investimi prej 10.8 miliardë dollarë do të mirëpres 120 milion pasagjerë në vit
Aeroporti Ndërkombëtar i Kinës Chengdu Tianfu i shumëpritur ka filluar zyrtarisht operacionet, duke u ofruar udhëtarëve një portë të re për në shtëpinë e pandave gjigante. Fluturimi i tij inaugurues, i operuar nga Sichuan Airlines, u ngrit në 11:10 të Dielën, me destinacion Pekinin.
Chengdu, kryeqyteti i provincës Sichuan, tani është qyteti i tretë në vend që ka dy aeroporte ndërkombëtare, duke iu bashkuar Shangait dhe Pekinit. E ndërtuar me një kosto prej rreth 70 miliardë juan kinez (10.8 miliardë dollarë), faza e parë e qendrës masive të aviacionit ka kapacitetin për të trajtuar deri në 60 milion pasagjerë në vit, duke hapur më tej rajonin jugperëndimor të vendit.
Tre pista dhe dy terminale, që mbulojnë një sipërfaqe totale prej 710,000 metra katrorë, janë në veprim. Media shtetërore Xinhua raportoi se aeroporti përfundimisht do të strehojë terminale që mbulojnë 1.4 milion metra katrorë, të aftë për të trajtuar 120 milion pasagjerë në vit.
Sipas shifrave të fundit nga Shoqata Ndërkombëtare e Transportit Ajror (IATA), trafiku i brendshëm i Kinës u rrit me 6.8% në Prill 2021, krahasuar me Prillin 2019. Aeroporti Ndërkombëtar i Baiyun në metropolin jugor të Guangzhou ja kaloi Hartsfield-Jackson të Atlantës për t’u bërë aeroporti më i ngarkuar në botë në vitin 2020.
Para pandemisë, Aeroporti i vjetër Ndërkombëtar Chengdu Shuangliu ishte i katërti më i madh në vend, nga vëllimi i pasagjerëve. Në vitin 2020, ishte në të vërtetë i dyti për nga madhësia pasi ishte më pak i ndikuar nga pandemia sesa aeroportet e tjerë të mëdhenj për shkak të mbështetjes së tij të lartë në tregun e brendshëm. (CNN)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.