Kina, në dakordësi me SHBA – Do të importojë më shumë mallra amerikanë për të balancuar tregtinë
Kina ka rënë dakord që të rrisë ndjeshëm blerjen e mallrave dhe shërbimeve amerikane, por nuk bëri premtime për reduktimin e deficitit tregtar me 200 miliardë dollarë, që Shtëpia e Bardhë kishte thënë më parë. Pekini dhe Washingtoni ranë dakord se do të vazhdojnë bisedimet për detajet se si Kina do të importojë më shumë energji dhe lëndë të para bujqësore nga SHBA, për të mbyllur deficitin tregtar mes vendeve.
Në deklaratën pas përfundimit të takimit të ekipit ekonomik të presidentit Xi Jinping në Washington, nuk u përmend nëse dy vendet do të tërheqin kërcënimet e tarifave prej miliarda dollarësh, që kanë nxitur shqetësimet e një lufte tregtare.
“U ra dakord që të merren masa efektive për të reduktuar ndjeshëm deficitin tregtar të mallrave të SHBA me Kinën.
Për të përballuar nevojat e konsumit të popullit kinez dhe nevojën e zhvillimit ekonomik me cilësi të lartë, Kina do të rrisë ndjeshëm blerjen e mallrave dhe shërbimeve amerikane”, deklaruan përfaqësuesit e të dy vendeve.
Presidenti Donlad Trump ka kërcënuar vendosjen e tarifave në mbi 150 miliardë dollarë mallra kinezë, për të luftuar shfrytëzimin e pronës intelektuale nga Pekini, nëpërmjet kërkesave në tregun kinez për transferimin e detyrueshëm të teknologjisë.
Kina i mohoi këto akuza dhe kërcënoi për kundërpërgjigje, përfshirë tarifa për importet e avionëve, automjeteve dhe sojës.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.