“Kina, një manipulues i valutës” – SHBA etiketon vendin. Pekini: Do ketë kaos në tregjet financiarë!

Banka Qendrore e Kinës deklaroi se vendimi i Washingtonit për të etiketuar Pekinin si një manipulues të valutës do të shkaktojë kaos në tregjet financiarë ndërkombëtarë.  Sipas institucionit qendror në Kinë, vendimi do të parandalojë gjithashtu rimëkëmbjen ekonomike botërore.  “Kina nuk ka përdorur kursin e këmbimit si një mjet për t’i bërë ballë konflikteve tregtare”, shkruhet në faqen në web të Bankës Qendrore të Kinës.  Akuzat për manipulimin e valutës nga SHBA, që erdhën pas rënies së fortë të juanit ditën e Hënë, kanë rritur tensionet mes 2 ekonomive më të mëdha në botë dhe kanë larguar shpresat për një rezolutë në luftën tregtare.

Konflikti është përhapur përtej tarifave në fushë të tjera si teknologjia dhe analistët kanë paralajmëruar se këto masa mund të dëmtojnë më tej besimin e bizneseve dhe rimëkëmbjen ekonomike botërore.   Departamenti i Thesarit në SHBA deklaroi se për herë të parë që prej vitit 1994, ka zbuluar se Kina po manipulon valutën, duke çuar luftën tregtare përtej tarifave.  Sipas të përditshmes së partisë komuniste në Kinë, People’s Daily,  vendimi i SHBA është nxitur kryesisht nga motivet politike për të “shfryrë inatin”.

Vendimi i SHBA për të etiketuar Kinën si manipulues të valutës vjen 2 javë pasi Fondi Monetar Ndërkombëtar bëri të ditur se vlera e juanit është në linjë me themelet ekonomik të kinës.  Fondi vlerësoi gjithashtu se dollari amerikan është i mbivlerësuar në 6-12%.  Ligji amerikan cakton 3 kushte për të identifikuar manipulimin e partnerëve tregtarë: një sufiçit  të llogarisë korrente, sufiçit tregtar të madh me SHBA dhe ndërhyrje të vazhdueshme të njëanshme në tregun e këmbimit valutor.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.