“Kina nuk kërkon të kalojë SHBA” – Wei: Le të qëndrojë “bosi” i botës. Ne jemi përgatitur të luftojmë
Ministri kinez i Mbrojtjes, Wei Fenghe tha se Kina nuk kërkon të kalojë Shtetet e Bashkuara si fuqia mbizotëruese botërore, por është përgatitur që të luftojë deri në fund nëse do të nevojitet, ndërkohë që tensionet tregtare mes 2 ekonomive më të mëdha në botë janë rritur. “Kina nuk ka qëllim as fuqi, për t’u bërë sunduesi i botës dhe nuk po kërkon të luftojë me SHBA për këtë status”, tha ai në një konferencë në Singapor.
Sipas tij, përballja mes Kinës dhe Shteteve të Bashkuara nuk është në interes të të dy vendeve, njerëzve dhe gjithë botës. Wei shtoi se Kina kërkon ende të zgjidhë problemet tregtare nëpërmjet dialogut. “Nëse SHBA kërkon të bisedojë, ne e kemi derën hapur. Nëse duan të luftojnë, ne do luftojmë deri në fund”, tha ai. Konflikti tregtar mes Kinës dhe Shteteve të Bashkuara u përkeqësua në muajin Maj, kur Presidenti Donald Trump rriti tarifat ndaj mallrave kinezë dhe akuzoi Pekinin për mos mbajtjen e premtimeve në negociata.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.