Kina paralajmëron SHBA – “Të gjithë marrëveshjet tregtare do të prishen, nëse vendosen tarifat”
Kina paralajmëroi Shtetet e Bashkuara se çdo marrëveshje mbi tregtinë dhe biznesin që mund të arrihet mes dy vendeve, do të hidhet poshtë nëse Washingtoni vendos tarifa në importe dhe masa të tjera proteksioniste.
Ky paralajmërim erdhi pas përfundimit të bisedimeve në Pekin mes sekretarit të Tregtisë, Wilbur Ross dhe zv/kryeministrit kinez, Liu He. Ndërsa nuk u specifikua ndonjë marrëveshje e re, kjo nënkuptoi dakordësinë e arritur muajin e kaluar në Washington, ku Kina pranoi të rrisë ndjeshëm blerjen e mallrave dhe shërbimeve amerikane për të ulur defiçitin.
Shtetet e Bashkuara dhe Kina janë përfshirë në një konflikt tregtar dhe vendet kanë kërcënuar vendosjen e tarifave që arrijnë në 150 miliardë dollarë për secilin. Kina ka shprehur gatishmëri për të rritur importet nga të gjithë partnerët tregtarë, përfshirë Shtetet e Bashkuara, “Reformat, hapja e tregut dhe rritja e kërkesës së brendshme janë strategjitë kombëtare të Kinës”, shkruajnë mediat lokale.
Megjithatë, nëse Shtetet e Bashkuara prezantojnë sanksione tregtare përfshirë rritjen e tarifave, të gjithë dakordësitë ekonomike dhe mbi tregtinë , do të hidhen poshtë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.