Kina refuzon investigimin e dytë të OBSH / “Nuk ka asnjë provë që Covid-19 mund të ketë dalë nga laboratori”
Kina ka refuzuar planin e Organizatës Botërore të Shëndetësisë për fazën e dytë të investigimit mbi origjinën e koronavirusit, që përfshin edhe hipotezën se virusi mund të ketë dalë nga një laborator kinez. Këtë muaj, OBSH propozoi zhvillimin e një fazë të dytë studimi mbi origjinën e koronavirusit në Kinë, duke përfshirë laboratoret dhe tregjet e qytetit të Vuhanit dhe kuroi transparencë nga autoritetet. “Nuk do të pranojmë një plan të tillë për gjurmimin e origjinës së virusit, pasi në disa aspekte, shpërfill mendjen e shëndoshë dhe sfidon shkencën”, deklaroi Zeng Yixin, zëvendësministër i Komisionit Kombëtar të Shëndetësisë. Zeng shtoi se u befasua kur lexoi për herë të parë planin e OBSH, pasi përmendet edhe hipoteza se një shkelje e protokolleve në laborator nga autoritetet kineze ka shkaktuar daljen e virusit. Më herët gjatë këtij muaji, kreu i OBSH-së, deklaroi se hetimet për origjinën e pandemisë së Covid-19 në Kinë po vështirësoheshin nga mungesa e të dhënave për ditët e parë të përhapjes së virusit. Por, Zeng përsëriti qëndrimin e Kinës se disa të dhëna nuk mund të ndahen plotësisht me të tjerët për shkak të shqetësimeve të privatësisë. “Shpresojmë që OBSH të rishikojë seriozisht konsideratat dhe sugjerimet e bëra nga ekspertët kinezë dhe të trajtojë vërtet origjinën e virusit si një çështje shkencore dhe ti lerë mënjanë ndërhyrjet politike”, shtoi Zeng. Rastet e para të njohura me Covid-19 u shfaqën në qytetin Vuhan në dhjetor të 2019. Besohej se virusi kaloi te njerëzit nga kafshët që shiteshin për ushqim në një treg të qytetit. Por, në maj të këtij viti presidenti amerikan, Joe Biden, urdhëroi ndihmësit e tij të gjejnë përgjigje mbi shumë pikëpyetje për origjinën e virusit që shkaktoi pandeminë globale.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.