Kina rrit mbështetjen për ekonominë në 2019 – Ndikohet nga lufta tregtare
Kina do të rrisë mbështetjen për ekonominë në vitin 2019 duke ulur taksat dhe duke mbajtur likuiditet të mjaftueshëm.
Kjo është vendosur pas një takimi vjetor të liderëve të lartë mes një mosmarrëveshje tregtare me Shtetet e Bashkuara. Qeveria ka nisur një sërë masash, duke përfshirë reduktimin e kërkesave të rezervës për bankat, shkurtimet e taksave dhe shpenzimet e infrastrukturës, për të shmangur një ngadalësim të mprehtë në ekonominë e dytë më të madhe në botë. Kina do të mbajë rritjen ekonomike të vitit të ardhshëm në “një interval të arsyeshëm” – tha deklarata, pas përfundimit të Konferencës Qendrore të Punës Ekonomike, një mbledhje me dyer të mbyllura të udhëheqësve të partisë dhe politikë bërësve.
“Ambienti i jashtëm është kompleks dhe i ashpër, dhe ekonomia po përballet me presion në rënie”, tha Xinhua, duke shtuar se qeveria do të mbajë politikën e saj fiskale proaktive dhe politikën e kujdesshme monetare vitin e ardhshëm. “Politika fiskale duhet të rrisë efikasitetin, të zbatojë shkurtime të taksave në shkallë të gjerë dhe ulje të tarifave dhe të rrisë ndjeshëm madhësinë e obligacioneve të veçanta të qeverisë vendore”.
Disa ekonomistë besojnë se shkurtimet më agresive të taksave vitin e ardhshëm mund të shtyjnë raportin vjetor të deficitit buxhetor në 3 për qind. Banka qendrore ka të ngjarë të japë më shumë ulje në raportet e detyrimeve të rezervës së bankave, por nuk mund të nxitojë për të ulur normat e interesit që mund të dëmtojnë juan CNY = CFXS.
Kina do të përpiqet t’i japë mbështetje vendeve të punës, tregtisë dhe investimeve, si edhe të zgjidhë vështirësitë financiare për firmat e vogla dhe private, duke ulur rreziqet dhe paqëndrueshmërinë e tregut financiar. Reuters raporton se këshilltarët qeveritarë kanë rekomanduar që Kina të ulë objektivin e rritjes së 2019 në 6.0-6.5 për qind në takimin vjetor për të hartuar axhendën ekonomike të vitit të ardhshëm.
Objektivi i rritjes nuk do të bëhet publik deri në hapjen e takimit vjetor të parlamentit në fillim të marsit.
E.T/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.