Kina rritet me 6.2% në T2 – Lufta tregtare me SHBA dëmton kërkesën e brendshme
Rritja ekonomike në Kinë u ngadalësua në 6.2% gjatë tremujorit të dytë të këtij viti, hapi më i ngadaltë i rritjes në 27 vitet e fundit, për shkak se kërkesa e brendshme dhe e jashtme u dëmtua nga lufta tregtare me Shtetet e Bashkuara të Amerikës. Ndërkohë që prodhimi i fabrikave dhe shitjet me pakicë u përmirësuan gjatë qershorit, disa analistë paralajmërojnë se ko tendencë mund të mos jetë e qëndrueshme dhe presin që Pekini të vijojë me më shumë masa mbështetëse në muajt e ardhshëm.
Partnerët tregtarë të Kinës dhe tregjet financiare po ndjekin nga afër shëndetin e ekonomisë së dytë më të madhe në botë, ndërkohë që lufta tregtare SHBA-Kinë po zgjat në kohë dhe po bëhet gjithmonë e më e kushtueshme. Për këtë arsye, analistët i ndruhen një recesioni të ekonomisë globale. Të dhënat për tremujorin e dytë të vitit sugjerojnë se ekonomia kineze mund ta ketë humbur vrullin, pas rritjes me 6.4% në tremujorin e parë. Kjo ka rritur pritshmëritë se Pekini duhet të bëjë më tepër për të rritur konsumin dhe investimet dhe të rikthejë besimin e bizneseve. Rritja përgjatë periudhës prill-qershor ishte në linjë me parashikimet e analistëve dhe ishte hapi më i ngadaltë që nga viti 1992.
Madje, analistët paralajmërojnë se rritja ekonomike në Kinë mund të ngadalësohet në 6% gjatë gjysmës së dytë të këtij viti, që do të testojë edhe objektivin e qeverisë për të zgjerim të ekonomisë mes 6 dhe 6.5%. Pekini ka ndërmarrë disa masa stimuluese deri më tani, si ulja e taksave me vlerë rreth 2 trilionë yuan ose 291 miliardë dollarë. Por, ekonomia ka qenë e ngadaltë për t’ju përgjigjur këtyre stimujve, ndërsa edhe besimi i bizneseve mbetet i kujdesshëm.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.