Kinezët nuk na e harrojnë prishjen e marrëdhënieve – Ja çfarë mendojnë për pjesën tjetër të Europës
Viti 1978 mund të duket shumë i largët, sidomos për të rinjtë, por në anën tjetër të rruzullit ka ngrirë perceptimin e kinezëve për vendin tonë.
Një hartë e publikuar së fundmi tregon stereotipet kryesore të Kinës ndaj vendeve të Europës, bazuar në kërkimet në Google.
Mendimi më i shpeshtë i kinezëve për vendin tonë është pikërisht prishja e marrëdhënieve në vitin 1978, siç e tregon edhe harta. Sado negativ, apo qejfmbetës të duket ky koment, është sigurisht më i mirë se stereotipet për disa vende të tjerë.
Kështu, për Greqinë kinezët shprehen se është “trokë”, për Italinë thonë se është “e dobët”, ndërsa Turqia “kundërshton Kinën”.
Çështjet territoriale janë mesa duket shumë të rëndësishme për kinezët, pasi ngrenë pyetje për një sërë vendesh. Për Spanjën, kinezët pyesin se pse nuk anekson Portugalinë. Dallimin midis Irlandës dhe Irlandës së Veriut e bëjnë në bazë se cila është e pavarur dhe cila jo.
Harta ka një sërë bindjesh negative si për Francën dhe për Gjermaninë. Po ashtu negative është përshtypja për Lituaninë, të ciulin e konsiderojnë një vend me prirje vetëvrasëse.
Ndërkohë perceptime të veçanta ka për Britaninë (e vogël por e fuqishme), për Norvegjinë (nuk është ftohtë), për Finlandën (flet mirë anglisht), për Suedinë (importon plehra) dhe për Danimarkën (vret balena).
Sa i takon stereotipeve më të bukura, ato padyshim i takojnë Rusisë, Ukrainës dhe Bullgarisë. Për rusët kinezët mendojnë se u pëlqen të zihen, tek Ukraina vlerësojnë femrat e bukura, ndërsa për Bullgarinë ekziston bindja se kanë jetëgjatësi më të gjatë për shkak të pirjes së qumështit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.