Klasa ekonomike në avion, tashmë më komode se në ‘business’!
Të fluturosh në klasën ekonomike nuk ka qenë kurrë kaq magjepsëse. Tashmë jo vetëm bileta të lira joshëse por dhe vende tepër të rehatshme.
Kompania britanike e dizajnit ‘’LAYER’’ ka krijuar një formë të re sedilje për klasën ekonomike e cila sjell idetë më të fundit të teknologjisë. I quajtur “MOVE” (lëviz) , kjo sedilje është konceptuar që të lidhet me sensorë nëpërmjet një aplikacioni në telefon, duke lejuar pasagjerët që të kontrollojnë manualisht temperaturën, tensionin, presionin dhe lëvizjen e këtyre sediljeve.
Aplikacioni gjithashtu do të japë komanda në momentin që pasagjerët dëshirojnë të shtrijnë këmbët apo të pijnë ujë. Këto sedilje janë konceptuar në një kombinim të ngjyrës së kuqe me atë blu, duke plotësuar kështu të gjitha nevojat që mund të ketë një pasagjer i shekullit të 21-të. Ato ofrojnë gjithashtu një xhep të veçantë për laptopë ose tableta dhe ka një opsion ku sedilja mund të bëjë masazh gjatë gjithë udhëtimit, nëse ju e aktivizoni.
‘’LAYER’’ thotë këto ndenjëse janë shumë të lehta duke reduktuar peshën e përgjithshme në bord të avionit dhe zvogëlojnë kështu karburantin. Këto sedilje morën 18 muaj kohë për tu dizenjuar.
“Shumë shpesh, konceptet e reja për të përmirësuar komoditetin në fluturim janë të përqendruara në klasën e biznesit”, thotë Hubert, dizenjator i këtyre sediljeve. “Ne ishim të ngazëllyer për të marrë këtë projekt me Airbus për të gjetur mënyra për të përmirësuar dhe shtuar vlerën e përvojës në klasën ekonomike si për pasagjerin ashtu edhe për kompaninë ajrore”– shprehet ai për CNN Travel.
E.Z/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.