Klasat kolektive, Nikolla: I mbyllim, transferojmë nxënësit në shkollat më të afërta
Ministrja e Arsimit Lindita Nikolla ka lajmëruar marrjen e masave për rreth 33 mijë nxënës që mësojnë në klasa kolektive me fëmijë të grupmoshave të ndryshme. Ndërhyrja e planifikuar vjen pas testimit të nxënësve për aftësitë në shkim-lexim, si dhe pas studimit të të gjithë sistemit të klasave kolektive në territorin e vendit, duke matur largësitë nga shkollat më të afërta.
“Kjo punë 8-mujore ka rezultuar në identifikimin e klasave që mund të transferohen në shkolla më të mëdha ku nxënësit do të mund të mësonin me bashkëmoshatarët e tyre jo me në klasa kolektive. Kemi bërë planin e veprimit për të realizuar këtë transferim.
Hapi i tretë po ndodh tani: hartimi i urdhrit për transferimin e nxënësve në shkollat më të afërta, si dhe sistemimin e mësuesve të këtyre nxënësve në sistem, duke i siguruar se askush nuk do të mbetet i papunë”, deklaroi Nikolla.
Ministrja i bëri apel prindërve të mbështesin këtë nismë, e cila u mundëson një arsim më të mirë fëmijëve të tyre.
Sa i takon klasave ku është e pamundur mbyllja, Nikolla njoftoi përqasjen e ministrisë.
“Paralelisht ne kemi studiuar modelet më të mira që sigurojnë përmirësimin e cilësisë së arsimit në klasat që e kemi të pamundur të mbyllim. Ky është dhe hapi i katërt i ndërhyrjes tone: kemi mbledhë udhëzues dhe doracak, me shembuj të orëve mësimore dhe metodave më efektive mësimore, që i kemi përkthyer dhe përshtatur për t’i ndarë me mësuesit e klasave kolektive. Gjithashtu themelojmë rrjetin profesional të mësuesve të klasave kolektive në mënyrë që të ndajnë përvojat me njëri tjetrin dhe të përmirësojnë zbatimin e kurrikulës së re edhe në zona të thella malore”, tha ministrja e arsimit.
Gjatë deklaratës për shtyp, Nikolla i cilësoi akuzat e opozitës për mbylljen e shkollave si përpjekje për të përbaltur punën e ministrisë. Ndërkohë, Nikolla falenderoi edhe drejtuesit vendorë për mbështetjen e dhënë në transportin e fëmijëve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.