“Kleçka” me liberalizimin e tregut të energjisë – Bizneset e lidhur në 20 kv, furnizuesit: OSHEE s’do ndërpresë energjinë, lihen edhe 2 vjet kohë
Pavarësisht se Operatori i Shpërndarjes së Energjisë Elektrike ka njoftuar se nga data 1 janar 2022 bizneset e lidhur në tensionin 20 KV do të dalin në treg të lirë energjie, furnizuesit që operojnë në treg thonë se kjo datë nuk nënkupton aspak përmbylljen e këtij procesi, çka do të thotë se afatet ligjore për përmbylljen e këtij procesi do të vijojnë të shkelen, ndonëse ato tashmë janë tejkaluar disa herë.
Kompanitë që janë të licencuara nga Enti Rregullator i Energjisë në aktivitetin e furnizimit me energji elektrike thonë për TV SCAN se nuk kanë marrë ndonjë njoftim zyrtar nga OSHEE, por ata i referohen njoftimit të bërë publik vetëm në media ku citohet se bizneseve iu lihet 2 vjet kohë për të vendosur nëse do të shkëputen nga OSHEE apo jo. Kjo, ndryshe nga procesi që u ndoq me bizneset e lidhur në tensionin 35 KV, të cilëve nga data 17 mars 2020, iu ndërpre furnizimi me energji nga kompanitë e OSHEE Group dhe më pas ishte në dëshirën e tyre në rast se do të zgjidhnin këtë furnizues apo një tjetër kompani të licencuar në këtë aktivitet.
Vetë njoftimi i OSHEE specifikon se bizneset e lidhur në tensionin 20 KV janë të detyruar të lidhin një kontratë furnizimi me një furnizues të ri, brenda 2 viteve nga fillimi i kontratës së furnizimit nga Furnizuesi i Mundësisë së Fundit, duke specifikuar se ky afat përfundon në datë 1 janar 2024. Ndërkohë që vetëm në përfundim të tij, në rast se nuk është arritur të lidhet një kontratë furnizimi me furnizues alternativ, Operatori i Sistemit të Shpërndarjes do të procedojë me ndërprerjen e furnizimit me energji elektrike.
Ndërkaq, sipas furnizuesve të licencuar edhe njoftimi i bërë nga OSHEE është tejet i vonuar, pasi bizneset që duan të shkëpusin marrëdhënien e furnizimit me këtë kompani do të duhet të plotësojnë kushtet teknike të instalimit të sistemit të matjes për daljen në treg të liberalizuar, çka normalisht kërkon kohë dhe investim.
Ndërkaq, ata shtojnë se disponojnë të gjitha kapcitetet për të ofruar energji për bizneset, në rast se ata do të kërkojnë të lidhin një kontratë. Për shkak të konkurrenës, liberalizimi I tregut të energjisë parashikohet të sjellë çmime më të ulta për bizneset, ndërkohë që përfundimi I këtij procesi është kërkuar shpesh herë nga Komuniteti I Energjië, që ka adresuar edhe kritika për shkak të mospërfundimit të tij.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.