Klosi në Izrael: Në prill, linjë direkte Tiranë-Tel Aviv 2 herë në javë, disafishim i numrit të turistëve
Nga 13 prilli do të nis funksionimi i linjës direkte të fluturimit Tiranë – Tel Aviv me frekuencë 2 herë në javë.
Ministri i Turizmit dhe Mjedisit Blendi Klosi gjatë takimit me homologun e tij Yariv Levin në Izrael deklaroi se nga kjo marrëveshje pritet të disafishohen numri i turistëve izraelit, ku do t’iu ofrohet përveç të tjerave, edhe rrugëtimi historik i hebrenjve në Shqipëri.
“Pritshmëria është të disafishohet numri i turistëve izraelitë në Shqipëri, duke shkuar drejt 50 mijë vetë në vit. Në destinacionet turistike të Shqipërisë, turistëve izraelitë do t’u ofrohet përveç të tjerave, edhe rrugëtimi historik i hebrenjve në Shqipëri, si vendi i rrallë në botë që numëron më shumë hebrenj në mbarim të Luftës së 2-të Botërore sesa në fillim të saj”.
Nga ana tjetër ministri Levin përshëndeti nismën konkrete të bashkëpunimit mes dy vendeve, atë të lidhjes direkte të fluturimeve, si një mekanizëm që do të nxisë më tej shkëmbimet turistike dhe ekonomike.
“Është një miqësi e lindur në kohët e vështira të Luftës së Dytë, kur shqiptarët u bënë dera e mikpritjes së mijëra familjeve hebreje”.
Kjo miqësi po zhvillohet në rrafshin ekonomik, vijoi ministri i Turizmit të Izraelit, duke shprehur interesin në rritjen e komunikimit të agjencive turistike mes dy vendeve, Shqipërisë dhe Izraelit.
Ministri Shqiptar i Turizmit, Blendi Klosi bëri një paraqitje të nismave të fundit të qeverisë shqiptare për nxitjen e investimeve në fushën e turizmit, në lehtësirat fiskale për ndërtimin e hoteleve dhe resorteve me 4 dhe 5 yjeve.
Ministri Klosi ftoi homologun izraelit për vizitë zyrtare në Shqipëri, ftesë të cilën homologu izraelit e mirëpriti me kënaqësi.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.