KLSH bën bilancin: Për periudhën janar-shtator u konstatuan parregullsi në vlerë 720.5 milion euro! Sektorët ku është abuzuar më shumë
Kontrolli i Lartë i Shtetit ka bërë publike raportin 9 mujor të punës, ku rezulton se janë konstatuar shjkelje më dëm ekonomik më shumë se 720,5 milion euro.
Për periudhën janar – shtator 2017, Kontrolli i Lartë i Shtetit, nga 124 auditime të planifikuar për auditim ka ushtruar dhe ka vijuar me përgatitjen e materialeve për 136 auditime.
Nga auditimet e realizuara gjatë periudhës Janar – Shtator 2017 janë konstatuar parregullsi dhe shkelje financiare që i përkasin periudhës objekt auditimi 2014-2016.
a-Parregullsi dhe shkelje financiare, në të ardhurat dhe në shpenzimet e kryera, me dëm ekonomik në shumën totale prej 9,226 milion lekë (69 milion euro), nga e cila ka rekomanduar për shpërblim dëmi shumën 5,601.6 milion lekë.
“Vlera 2,864.5 milion lekë është pagesë e kryer nga OSHEE për CEZ A.S. Vlerësohet si dëm ekonomik pa mundësi arkëtimi” evidentohet në raportin e KLSH-së.
b)Shkelje të disiplinës financiare me ndikim negativ në perfomancën e subjekteve të audituara, në shumën totale prej 86,961 milionë lekë, afërsisht 651,3 milionë euro nga e cila: 81,244 milionë lekë në fushën e të ardhurave, afërsisht 608,5 milionë euro dhe 5,717 milionë lekë afërsisht 42,8 milionë euro, në fushën e shpenzimeve.
Në total, sipas KLSH-së janë konstatuar shkelje në shumën 96,188 milionë lekë ose afërsisht 720,5 milionë euro.
c)Për vitin 2016 rritja e detyrimeve ndaj tatimeve dhe doganave (borxhi tatimor dhe doganor) si dhe skemës së sigurimeve shoqërore është në vlerën 51,175 milion lekë ose 41% më e lartë se viti 2015.
Nëse analizohet dëmi sipas sektorëve vërehet se niveli më i lartë i dëmit për këtë periudhë është ai i shkaktuar në administrimin e pronës shtetërore në vlerën 2,769,696 mijë lekë ose 30% të vlerës totale të dëmit të zbuluar dhe në riblerjen e pasurisë shtetërore në vlerën 2,864,592, mijë lekë ose 31%.
Dëmi i konstatuar në realizimin e të ardhurave në dogana është në vlerën 1,752,816 mijë lekë ose 19%, pasuar nga 12% në fushën e prokurimeve, sektor që mbetet me një risk të lartë për sa kohë shkeljet nuk lidhen vetëm me dëmin e zbuluar por edhe me mungesën e efektivitetit të një sistemi të plotë që siguron prokurimin e mallrave/punimeve/shërbimeve.
Për shkeljet e konstatuara, KLSH u ka kërkuar organeve respektive shqyrtimin dhe marrjen e 1014 masave disiplinore dhe administrative.
Për periudhën janar – shtator 2017 KLSH ka depozituar në organet e Prokurorisë 29 kallëzime penale, nga të cilat 10 dosje për vlerësim. Numri i personave të kallëzuar penalisht në këto kallëzime penale arrin në 83.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.