KLSH: Dëmi kolosal në buxhet, 694 Mln Euro – Arben Shehu: Shkeljet me tenderat, me pronat shtetërore, evazionin fiskal

Përgjatë vitit 2020, Kontrolli i Lartë i Shtetit ka konstatuar një dëm ekonomik prej rreth 694 milionë eurosh, i shkaktuar përmes keqmenaxhimit të fondeve publike, evazionit, apo korrupsionit. Kreu i KLSH Arben Shehu ka paraqitur të enjten në Kuvend raportin e punës së institucionit për vitin 2020,  ku institucioni konstaton Shkelje të disiplinës financiare me ndikim negativ në perfomancën e subjekteve të audituara, në shumën 85,8 miliardë lekë, nga e cila: 11,3 miliardë lekë në fushën e të ardhurave, afërsisht 91.9 milionë euro dhe 74,4 miliardë lekë afërsisht 602.2 milionë euro, në fushën e shpenzimeve.

Parregullsitë dhe shkeljet më të mëdha me efekte të konsiderueshme konsistojnë në lidhje me administrimin e të ardhurave tatimore dhe jo tatimore; menaxhimin jo të kujdesshëm në procesin e përdorimit të fondeve publike; keqadministrimin e pronës shtetërore ndjekur nga paligjshmëritë procedurale dhe ineficencat në realizimin e procedurave të prokurimit publik.

Kontrolli i Lartë i Shtetit ka audituar gjatë vitit të shkuar 91 subjekte, mes të cilave institucione qendrore, ministri dhe agjenci (përfshirë drejtori qendrore dhe rajonale në varësi të tyre), njësi të vetëqeverisjes vendore (qarqe, bashki), drejtori të përgjithshme të administrimit fiskal, fonde speciale, si dhe shoqëri aksionare me capital shtetëror, në të cilën shteti ka mbi 50% të aksioneve, apo projekte me financim të huaj.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.