KLSH përplaset me ERE – Refuzon auditimin, reagon ERE, Ahmeti: S’ua lejon ligji
Enti Rregullator i Energjisë ka refuzuar 2 herë auditimin nga Kontrolli i Lartë i Shtetit, ndërsa sipas kësaj të fundit argumentimet e dhëna nga ERE nuk e justifikojnë këtë qëndrim. Sipas Departamentit të Performancës në KLSH, ndonëse ERE ka ligjërisht statusin e personit juridik publik, argumentimi për qëndrimin që mban i referohet faktit se buxhetin institucional e siguron nga pagesat e operatorëve privatë të sektorit energjetik dhe jo nga shteti.
Sipas KLSH një sistem kapitalist, buxheti i çdo enti publik, drejtpërdrejt apo tërthorazi, buron në masën më të madhe nga sektori privat, por në momentin që i kalon një agjencie shtetërore, ajo shndërrohet në para publike. Por, pas këtyre akuzave ka reaguar kreu i Entit Rregullator të Energjisë, Petrit Ahmeti, i cili tha për TV SCAN se “sipas ligjit, ERE nuk është objekt kontrolli i KLSH”.
“Insistimin e kësaj natyre për të kontrolluar Entin Rregullator, unë më tepër e konsideroj një lapsus nga ana e KLSH-së. Ne s’kemi asnjë lloj financimi nga buxheti i shtetit. Gjithë buxheti i ERE-s varet nga licencimi i kompanive në tregun e energjisë elektrike apo dhe të gazit nesër apo pasnesër. Ne nuk kemi asnjë problem me KLSH-në apo ndonjë organizëm tjetër të shtetit, por për të respektuar edhe autoritetin ligjor të institucionit, unë i kam dhënë një përgjgjie me shkrim, ku thuhet se Enti Rregullator çdo vit raporton në komision parlamentar dhe Parlament për aktivitetin, qoftë ligjor, qoftë financiar. Ne auditohemi nga auditues privatë, sipas ligjeve të shtetit. Këtu janë 5 komisionerë të zgjedhur nga Parlamenti, që marrin vendimet dhe vendimi i tyre mund të anatemohet vetëm në gjykatë. Praktikisht, janë disa rregulla dhe procedura dhe ligji na ka vendosur në këtë pozicion”, u shprehet Ahemti
Sipas Ahmetit, KLSH-së i është dërguar edhe një letër mirëkuptimi dhe bashkëpunimi për të biseduar në lidhje me problematikat që mund të hasen në sektorin energjetik.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.