KLSH zbardh arbitrazhet e humbura nga Shqipëria – Raporti: Nga 5 çështje të mëdha, detyrimi financiar për t’u paguar 388.5 milionë Euro
Ndërsa bëhen publike shumë pak detaje nga arbitrazhet ndërkombëtare ku është i përfshirë shteti shqiptar, është Kontrolli i Lartë i Shtetit ai që më në fund zbardh disa të dhëna konkrete mbi numrin e tyre dhe ç’është më e rëndësishme kostot që paguhen nga buxheti i shtetit për të ekzekutuar vendimet. Kontrolli i Lartë i shtetit sapo ka publikuar rezultatet e auditimit që ka kryer gjatë vitit 2021 pranë Avokaturës së Shtetit. Raporti konstaton të meta të mëdha në punën e këtij institucioni që mbron interesat e Shqipërisë në arbitrazhet ndërkombëtare, por ç’është më e rëndësishme shifrat prej qindra miliona eurosh të humbura prej saj.
Nga auditimi rezultoi se, në gjykatat e huaja ndërkombëtare dhe arbitrazhin ndërkombëtar Shteti Shqiptar ka qenë si Palë e Paditur në 14 çështje gjyqësore, bën me dije KLSH në raport. Nga këto rezultoi se janë gjykuar dhe dhënë vendimet për 9 çështje ndërsa 5 prej tyre presin gjykimin pranë këtyre gjykatave.
-Në 5 çështje të gjykuara, vendimi ka rezultuar në disfavor të Shtetit Shqiptar me një detyrim financiar prej rreth 388.5 milion Euro, thekson Kontrolli I Lartë I Shtetit, duke raportuar gjithashtu se thuajse për të gjitha rastet Avokatura e Shtetit nuk dispononte informacion të plotë mbi njohjen e këtyre vendimeve pranë Gjykatave të Apelit vendase, si dhe ecurisë së ekzekutimin të tyre. Kjo si rrjedhojë e mos thirrjes në gjykim nga këto gjykata apo dhe nga institucionet respektive si palë e interesuar.
Vendimet të cilat zënë peshën më të madhe janë çështjet e gjykuara në ICSID, “Qendra Ndërkombëtare për Zgjidhjen e Mosmarrëveshjeve në Fushën e Investimeve” ARB/15/28 Hydro S.r.l and others me një vlerë prej rreth 108+ milion Euro, si dhe çështjes në Gjykatën Ndërkombëtare të Arbitrazhit të ICC me qendër në Paris, 21349/GR V2015 Bankers Petroleum Albania ltd, me vlerë prej rreth 221.7 milion Euro. Në këto raste ekziston risku për kërkime për njohjen e vendimit edhe në gjykata të tjera ndërkombëtare ku Shteti Shqiptar gëzon të drejta.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.