Klubet më të pasura – Manchester United në vend të parë, vlen 3.1 mld
Kompania KMPG, një ndër më të rëndësishmet në nivel global sa i përket konsulencës financiare ka renditur 10 klubet më të pasura të futbollit në nivel global. 6 prej tyre janë klube angleze, të cilat vijojnë të dominojnë listën.
Në vend të parë qëndron Manchester United që i ka rrëmbyer vendin Real Madridit. Klubi i Manchesterit që kontrollohet nga familja amerikane Grazer, ka një vlerë prej 3.1 miliardë eurosh, në rritje me 34% në krahasim me vitin e kaluar, pavarësisht se klubi ka plot dy vite që nuk merr pjesë në kompeticionin më të rëndësishëm europian, që është Liga e Kampionëve.
Real Madridi ndërkohë, pavarësisht se një vit më parë fitoi Champions League, ka pësuar një rënie me 8%, në 2.97 miliardë euro. Në vend të tretë renditet Barcelona, me 2.76 miliardë euro, në rritje me 5%.
Klubi bavarez i Mynihut ka një vlerë prej 2.44 miliardë euro nënvizon KMPG, në rritje me 25% në krahasim me një vit më parë.
Nga vendi i pestë në vendin e tetë ndërkohë, janë plot 4 ekipe angleze; Manchester City me 1.97 miliardë në rritje me 44%, Arsenali me 1.95 miliardë në rritje me 10%, Chelsea me 1.6 miliardë, në rritje me 59% dhe Liverpool.
Në vend të nëntë renditet e vetmja italiane pjesë e listës, Juventus, me 1.5 miliardë euro vlerë, në rritje me 9%. Dhjetëshen e mbyll klubi i Totenhamit. Sipas kompanisë, 32 klubet më të mëdha europiane vlejnë në total 30 miliardë euro, ose 14% më shumë në krahasim me vitin 2015.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.