Koalicioni gjerman në ‘rrëmujë’ mbi emërimin e von der Leyen në BE
Emërimi i Ursula von der Leyen në krye të Komisionit Europian nuk i dha arsye Social Demokratëve (SPD) të largoheshin nga koalicioni qeverisës i Gjermanisë, tha një udhëheqës i partisë të enjten. Vendimi i Këshillit Europian këtë javë për të emëruar ministren e mbrojtjes gjermane i zemëroi shumë anëtarët e SPD. Ish kreu i SPD Sigmar Gabriel tha se vendimi, pa miratimin e kabinetit, dha baza për t’i dhënë fund koalicionit qeverisës në Berlin. Por Malu Dreyer, kreu i qeverisë rajonale Rheinland-Pfalz dhe një nga tre drejtuesit e SPD-së në veprim, tha për televizionin publik ZDF: “Nuk do të shkoj aq larg, sepse unë nuk mund ta ngarkoj Merkel për shkeljen e marrëveshjes së koalicionit. “Ajo abstenoi në votimin e Këshillit.”
Merkel ishte e vetmja nga krerët që të nuk votoi për aleatin e saj të ngushtë në Këshillin Europian të së hënës, pas një përpjekjeje të gjatë për të bindur partnerët e saj të koalicionit, gjithçka rezultoi e pafrytshme. SPD pësoi disfatën e saj më të madhe në mbarë vendin që kur demokracia u kthye pas Luftës së Dytë Botërore në zgjedhjet europiane më 26 maj.
Shumë anëtarë të saj kërkojnë një ndërprerje të aleancës së tyre me bllokun konservator të Merkel. Markus Soeder, kryeministri konservator i Bavarisë, tha: “SPD ka siguruar që Gjermania është i vetmi vend në Këshill që nuk mund të votonte për Gjermaninë. “Kjo është sigurisht unike në historinë e Republikës Federale të Gjermanisë dhe një barrë e vërtetë për koalicionin”. (Reuters)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.