“Koha po mbaron, Theresa!”- Kryeministrja në presion për të lënë detyrën që të kalohet Brexit!
Kryeministrja britanike, Theresa May ndodhet nën presion për t’u larguar nga detyra, në mënyrë që të bindë rebelët e Brexit në partinë e saj që të mbështesin traktatin e divorit me Bashkimin Europian, që është mposhtur dy herë në parlament.
Ndërkohë që 3 vite kanë kaluar që prej referendumit mbi anëtarësinë në Bashkimin Europian në vitin 2016, është ende e paqartë se si dhe kur do të ndodhë Brexit. Ndërsa fuqia e Theresa May është dobësuar, ministrat këmbëngulën që ajo të qëndrojë në detyrë dhe të mohojë komplotin e largimit të saj nga detyra.
“Koha ka mbaruar, Theresa”, shkruante e përditshmja “the Sun” në faqe të parë, ku shpjegonte se shansi i vetëm i saj për të fituar mbështetje në parlament për marrëveshjen e saj, është caktimi i një date për t’u larguar nga detyra. Mbretëria e Bashkuar, që dha 52% të votave për të dalë nga Bashkimi Europian në referendumin e vitit 2016, qëndron ende e ndarë për Brexit.
Pas protestave në Londër ditën e Shtunë, ku kërkohej një tjetër referendum, Theresa May thërriti rebelët e Brexit në rezidencën e saj, për të gjetur një mënyrë që të kalojnë këtë barrierë. Sipas zëdhënësit të May në zyrën në Doëning Street, në takim u diskutuan shumë çështje, përfshirë mundësinë e një votimi tjetër këtë javë dhe nëse do të ketë mbështetjen e duhur në parlament.
Sipas mediave lokale, rebelët i kërkuan May që ajo të japë dorëheqjen, nëse do të kalojë marrëveshjen e say. May, raportohet se i ka thënë deputetëve se do të japë dorëheqjen, nëse marrëveshja e saj ratifikohet.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.