“Koha që Fed të ulë blerjet e obligacioneve” – Jerome Powell siguron tregjet, por shprehet se normat e interesit nuk do të rriten

Kreu i Rezervës Federale, Jerome Powell, deklaroi se banka qendrore amerikane duhet të fillojë procesin e zvogëlimit të mbështetjes së saj për ekonominë duke shkurtuar blerjet e aseteve të saj, por nuk duhet të prekë ende normën e interesit.

“Unë mendoj se është koha për të ulur blerjen e obligacioneve, ndërsa mendoj se nuk është koha për të rritur normat,” tha Powell, duke vënë në dukje se aktualisht ka ende 5 milionë më pak vende pune në SHBA krahasuar me periudhën përpara pandemisë së koronavirusit. Ai gjithashtu përsëriti pikëpamjen e tij se inflacioni i lartë ka të ngjarë të ulet vitin e ardhshëm pasi presionet nga pandemia të zbehen.

Fed ka premtuar të mbajë normën e saj standarde të interesit njëditor në nivelin aktual pranë zeros, derisa ekonomia të jetë rikthyer në punësimin e plotë dhe inflacioni të ketë arritur objektivin e bankës qendrore prej 2% dhe është në rrugën e duhur për të qëndruar mesatarisht mbi atë nivel për pak kohë.

Është “shumë e mundur” që qëllimi i punësimit të plotë të Fed-it të mund të përmbushet vitin e ardhshëm, tha Powell, nëse kufizimet e zinxhirit të furnizimit lehtësohen siç pritej dhe sektori i shërbimeve hapet më shumë, duke lejuar që rritja e vendeve të punës të përshpejtohet.

“Politika jonë është e pozicionuar mirë për të menaxhuar një sërë rezultatesh të besueshme,” shtoi Powell. “Ne duhet të shohim me kujdes nëse ekonomia po evoluon në përputhje me pritjet tona dhe të përshtatim politikën në linjë me rrethanat.”

Këto deklarata duket se i hapin derën një mundësie që Fed ka frikë: nevojën për të rritur normat e interesit për të parandaluar daljen e inflacionit jashtë kontrollit dhe duke vepruar kështu, duke shkurtuar rimëkëmbjen e vendeve të punës. Fed ka sinjalizuar se ka të ngjarë të fillojë muajin e ardhshëm zvogëlimin me 120 miliardë dollarë në blerjet mujore të bonove të thesarit dhe letrave me vlerë.

Rreth gjysma e politikëbërësve të Fed besojnë se një rritje e normave të interesit do të duhet të ndiqet në vitin 2022, me disa që sugjerojnë se mund të duhet të vijë deri në verë. Gjysma tjetër i shohin rritjet e normave si të papërshtatshme deri në vitin 2023.

Por të dhënat e fundit duket se po përputhen me pikëpamjet e atyre që nxitën për rritje të mëparshme të kostove të huamarrjes, pasi çmimet e konsumit janë rritur me më shumë se dyfishin e objektivit të Fed.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.