Kohë e vështirë për Kinematë, Cineworld pritet të mbyllë ekranet në Britani. Shumë filma shtyhen për 2020
Cineworld, operatori i dytë më i madh i kinemave në botë, pritet të mbyllë të gjithë qendrat në Britani dhe Irlandë në javën e ardhshme, sipas Sunday Times. E përditshmja në Londër bën të ditur se zotëruesi i kinemave “regal” do t’i shkruajë kryeministrit Boris Johnson dhe ministrit të kulturës, Oliver Dowden, për t’i thënë se industria nuk po mbijeton dot, për shkak të vendimit të studiove për të shtyrë filmat me buxhet të madh.
Filmi i fundit James Bond “No Time To Die”, u bë i fundit me buxhet të madh që shtyhet për vitin e ardhshëm, ndërkohë që industria e filmave po has vështirësi të rikthehet, për shkak të pandemisë së koronavirusit. Cineëorld, që nisi të rihapë qendrat nga Korriku, ka një total prej 128 teatrosh dhe 1,180 kinemash në Mbretërinë e Bashkuar dhe Irlandë. Cineëorld pritet të lajmëroi planin gjatë javës, që mund të rrezikojë mbi 5,500 vende pune. Në Shtator, kompania deklaroi se mezi pret filmat e mbetur për vitin 2020, përfshirë “No Time To die”, filmin me superheronj “Black Widow” dhe “West Side Story” të Steven Spielberg. Ashtu si James Bondi i ri, të dy filmat e lartpërmendur janë shtyrë në vitin 2021.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.