“Kolaudimi”, në konsultim publik – Ndryshimet e plota në Kodin Rrugor/ Ja automjetet që do bëjnë kontroll teknik çdo vit

Propozimet e qeverisë për ndryshimin e frekuencës së kryerjes së kontrollit teknik të automjeteve janë nxjerrë për konsultim publik, ndërkohë që vetëm pas miratimit në parlament ato do të mund të hyjnë në fuqi. Ministria e Infrastrukturës dhe Energjisë ka paraqitur ndryshimet që do i bëhet Kodit Rrugor, duke përcaktuar dhe afatet e reja për kolaudimin e automjeteve, me kalimin e këtij shërbimi nga privati te shteti.

Sipas propozimit,  për mjetet e reja me motor, kontrolli teknik do të kryhet brenda tre vjetëve nga data e regjistrimit parë. Ndërkohë që, pas kësaj periudhe ky kontroll kryhet për çdo dy vjet. Ndërkaq, sipas ndryshimeve të propozuara disa kategori mjetesh do të duhet ta kryejnë çdo vit kontrollin teknik. Më konkretisht, këtu përfshihen mjetet që përdoren si taksi dhe ambulanca.

Gjithashtu, një herë në vit do të duhet të kryejnë kontroll teknik dhe mjetet e destinuara për transport pasagjerësh me më shumë se 8 ndenjëse, mjetet për transport mallrash me ngarkesë më të madhe se 3.5 tonë si dhe mjetet me rimorkio me peshë maksimale me ngarkesë më të madhe se 3,5 tonë. Këto kategori mjetesh, nëse janë të reja do të kryejnë kontrollin teknik brenda një viti nga data e regjistrimit të parë dhe më pas çdo vit. Sipas relacionit, që shoqëron projektligjin, shtrirja e këtij shërbimi në kohë do të lehtësojë shtetasit si në vlerë pagese, por dhe në kursim të kohës, shpenzimeve të lëvizjeve, etj.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.