Kolaudimi nga shteti nis në shkurt – Gonxhja: Paguani taksat vjetore të automjetit, kamata nuk falet

Ofrimi i shërbimit të kolaudimit nga shteti do të nisë në fillim të muajit shkurt”. Deklarata është bërë nga kreu i Drejtorisë së Përgjithshme të Shërbimeve të Transportit Rrugor, Blendi Gonxhja, gjatë diskutimit të Aktit Normativ për shtyrjen e vlefshmërisë së certifikatës së kontrollit teknik të automjeteve me 3-muaj.

Gonxhja solli në vëmendje se për pagesën e taksave vjetore të automjetit nuk ka asnjë shtyrje, duke theksuar se kamata nga mospagesa e tyre nuk falet.

Gjatë mbledhjes së komisionit u bë me dije se shtrirja e vlefshmërisë së certifikatës së kolaudimit me 3 muaj, bëhet për shkak të kalimit të shërbimit të kolaudimit të automjeteve nga shoqëria koncesionare, te Drejtoria e Përgjithshme e Shërbimeve të Transportit Rrugor si dhe rregullave të reja që parashikon Kodi i ri Rrugor, që është miratuar në qeveri e do të kalojë për diskutim në parlament.

Komisioni miratoi ndryshimet e propozuara përmes aktit normativ, ku përcaktohet zgjatja me 3 muaj e afatit të vlefshmërisë së certifikatës së kontrollit teknik të mjeteve me motor dhe rimorkiove të tyre. Shtesa e afatit me 3 muaj është për të gjithë ata që kanë një certifikatë kolaudimi të bërë në çdo kohë gjatë vitit 2020. Kjo do të thotë se të gjithë mjetet që kanë bërë kolaudimin vitin që sapo lamë pas, fitojnë këtë shtesë vlefshmërie, kurdo qoftë data e tyre sipas certifikatës.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.